DEBAK, 18 Jan: Servis dialisis ba menua pesisir lebih agi ba Sarawak deka dikemanah agi, ku Datuk Lukanisman Awang Sauni.
Sapit Menteri Pengerai nya madah, diatu seraka pemisi servis nya antara menua pesisir di Sarawak, Sabah enggau Semenanjung chukup jauh bida ari sukut pengawa meri servis.
Ku iya, pekara nya chukup berupai dipeda nengah pemisi servis nya ba Semenanjung nyau deka penuh tauka nadai sebarang penanggul bekaul enggau mesin dialisis ba klinik-klinik sereta sepital perintah enti dibanding enggau di Borneo (Sabah enggau Sarawak).
“Chukup jauh seraka servis dialisis ba menua pesisir di Semenanjung enggau mega di menua pesisir ditu.
“Dipuntang aku enggau jaku munyi tu, enti ba Semenanjung nyau mesin ke ngiga pesakit, tang ba Sarawak tu pesakit ke ngiga mesin’.
“Sekeda nya udah ngiga pan empai temu ulih, nyadi aku mansutka sebana tu ngelai menua tu endang chukup begunaka mesin dialisis,” ku iya.
Iya madah munyi nya maya dirandau media pengudah tembu pejalai gawa ngagai Klinik Pengerai Debak, kemari.
Naka diatu Klinik Pengerai Debak bisi enam buah mesin dialisis dikena merubat urung 22 iku pesakit.
Tandu Lukanisman, iya mega setuju Klinik Pengerai Debak patut nyendiaka ruang ke lebih besai sereta endur raban pesakit berubat tauka begunaka servis dialisis.-TVS
