SPAOH, 15 Jan: Raban orang bumai ba Tanjung Sebekut ditu bela udah setuju menua sida endur ngemujurka Projek Nanam Padi Hibrid.
Sapit Premier Sarawak Datuk Amar Douglas Uggah Embas madah diri udah berandau enggau raban orang bumai di Tanjung Sebekut bekaul enggau projek nya.
“Kami bisi berandau enggau sekeda raban orang bumai di Tanjung Sebekut lalu minta pemendar ari sida bejalaika pengawa bumai nguna benih baru nya.
“Benih padi tu deka ulih diketau dua taun sekali tauka lima kali dalam dua taun lalu sida bela udah setuju,” ku iya.
Iya mansutka jaku nya rambau dirandau media pengudah tembu aum enggau bala tuai ejensi perintah enggau bala tuai rumah ba Bilik Aum Opis Pelilih Mit Spaoh empai lama.
Nangkan ke nya, Uggah ke mega Kaban Kunsil Nengeri (ADUN) Bukit Saban nerangka, projek nya mega udah dikerandau ke enggau Opis Betanam Betupi Enggau Opis Parit enggau Entali Ai (DID) Spaoh.
”Kitai mega udah berandau enggau sida ari Opis Betanam Betupi laban kitai deka nentuka projek tu ulih berengkah dipejalaika ba ditu,” ku iya.
Uggah madah, iya udah minta raban DID beratika gaya parit enggau entali ai ba Spaoh dikena nentuka palan nya engkeman endur nanam padi hibrid ke ke ulih diketau dua kali setaun tauka lima kali dalam dua taun.-TVS
