SRI AMAN, 13 Jan: Rintai baru kunteriktor ti deka neruska Projek Jematan Rambungan deka dibantai ba kabinet enda lama agi.
Sapit Premier Sarawak, Datuk Amar Douglas Uggah Embas madah, pengawa mantaika keretas kereja nya betuju awakka kabinet ulih ngemendarka serikat-serikat ke bisi pengulih nyadi kunteriktor mantu neruska projek nya.
“Jematan Rambungan iya nya siti ‘projek sakit’ lalu kitai ke udah ngemaduka kunteriktor asal.
“Nyadi diatu kitai deka mantaika keretas kereja ba kabinet awakka ulih ngerintaika perambu serikat-serikat (baru) ke ulih mantu neruska (projek) Jematan Rambungan,” ku iya.
Uggah ke mega Menteri Pemansang Infrastruktur enggau Pemansang Penyangkai Kapal Sarawak mansutka pekara nya pengudah ngulu Program Penyerakup GPS Engkilili di Dewan Serbaguna Kaunsil Pelilih Lubok Antu di Engkilili, pagi tadi.
Lebuh nerang silik, ku uggah tu endang pelin timpuh panjai ngambika kuntriktor ke dipilih ila ulih nampung pengawa ba projek nya.
“Pelin timpuh panjai iya nya kitai deka nyiri kunteriktor baru ngambika kunteritor nya ulih bejalaika pengawa nampung projek nya…bedau nganti kabinet ngemendar, tu mesti dulu dibai ngagai kabinet,” ku iya.
Ke penerang, Projek Jematan Rambungan ke beungkus RM98.5 juta nya enti nitih ditaga tembu taun 2023 tang napi sekeda penanggul ngujungka betukar kunteriktor lalu tejanggal nyentuk ke sehari tu.-TVS
