SRI AMAN, 13 Jan: Sitak Kunsil Nengeri (DUN) Simanggang diatu terus ngasaika segang ubah pemansang ti dibai perintah Sarawak.
Sapit Menteri Pelajar, Inovasyen enggau Pemansang Bakat Sarawak, Datuk Francis Harden Hollis madahka, pekara tu nyengenda dipeda nengah projek pemansang ke benung dipejalaika perintah ungkup pengelantang rayat di sitak nya.
Iya ke mega Kaban Kunsil Nengeri (ADUN) Simanggang madah, rayat patut lantang ati enggau meri terima kasih naggai perintah Sarawak.
Nya alai, iya ngelalau Tuai Raban Bansa enggau Komuniti (KMKK) patut bejalaika pengawa enggau manah dalam nerangka ngagai nembiak redak ke dijaga sida senentang langgur pemansang ke benung dipejalaika perintah.
Berebak enggau nya, Harden bisi ngabas sekeda taba Projek Transformasyen Menua Pesisir (RTP) di sitak Kunsil Nengeri (DUN) Simanggang begulai enggau ejensi ke bekaul.
Entara projek ke bisi diabas iya projek ngaga gelanggang futsal di Kampung Muhibbah, langgur ngaga projek parit ari simpang Jalai Brayun ke stor SESCO.
Nitihka penerang ari ejensi pengatur JKR, projek sepanjai 250 meter nya dianggarka nelan kos RM1 juta.
Ungkup projek ke benung dipejalai iya nya ngemanahka tikas parit sepanjai 200 meter ari mua begunan Che Chuan Khor nyentuk ke mua begunan Radio Televisyen Malaysia (RTM) Sri Aman ti beungkus RM1.3 juta.
Pejalai bukai, Harden bisi ngabas  langgur ngemanahka sistem parit ari Arena Petanque nyentuk ke simpang Kampung Muhibbah pemanjai 800 meter.- TVS
