PUTRAJAYA, 13 Jan: Serikat Penerebai Bilun Batik Air Malaysia setuju muka penerebai tambah ari Kuala Lumpur ke Sibu, Sarawak, nyerumba pengerami Taun Baru China kena 6 enggau 7 Februari tu ila.
Menteri Pengangkut Anthony Loke Siew Fook madah, nya beduduk ari semua tikit penerebai kelas ekonomi ari Kuala Lumpur ke Sibu, ungkup 3 hari sebedau Taun Baru China, udah abis dijual lalu tinggal ungkup kelas dagang aja.
“Amat KL-Sibu nya enda mayuh penerebai maya jam pengerami, ke Kuching amat mayuh bilun, KK mayuh bilun enggau ke palan-palan bukai.
“Tang ungkup Sibu peminta nya chukup mayuh, aku dipadahka ungkup KL-Sibu tu amat diatu nadai agi tikit bilun, nyangka mayuh bedau bulih tikit dikena pulai ke Sibu.
“Beduduk ari nya, raban kami minta kerejasama Batik Air Malaysia meri sukung ngagai Opis Menteri Pengangkut nambahka agi penyampau (bilun) ari KL ke Sibu,” ku iya maya bejaku ba Aum Media ke diatur ditu, sehari tu tadi.
Nangkan ke nya, Loke madah berengkah 8 Februari tu, Batik Air Malaysia mega nyendiaka servis penerebai bilun belanggang ari Kuala Lumpur ke Sibu enggau Tawau, Sabah.
Ku terang Loke tu dikena nambahka penerebai bilun ngagai Kuching enggau Kota Kinabalu ke udah bisi diatu.
“Nyadi penerebai bilun tambah tu endang siti jalai baru ungkup Batik Air iya nya deka berengkah 8 Februari.
“Sida deka bisi bilun ke Tawau enggau Sibu tang aku udah dipadah sida ngambika nginsur tumu ngagai Sibu, tumu 2 hari enggau tambahka penerebai bilun ngambika penyampau nya mayuh, meri peluang ngagai sida ke empai bulih tikit,” ku tandu iya.
Kelimpah ari nya, iya madah Batik Air Malaysia setuju nyendiaka tambang kelas ekonomi rega tetap RM399 ungkup sekali pejalai Kuala Lumpur ke Sibu ke ditaga kena 6 nyentuk 9 Februari lalu pengawa nyual tikit berengkah tekala nya.
Ku iya, inisiatif Batik Air Malaysia kebendar dikena nambahka tambang tetap ari AirAsia ke udah dibantai minggu siti ke udah enggau mega nambahka 20 penerebai Malaysia Airlines ari Semenanjung Malaysia ke Sabah enggau Sarawak ungkup Musin Taun Baru China naka 4 Januari 2024.-TVS
