SPAOH, 12 Jan: Projek nupi crayfish tauka undang karang deka dikemansangka di sitak Spaoh.
Kaban Kunsil Nengeri (ADUN) Bukit Saban Datuk Amar Douglas Uggah Embas perambu deka ngemujurka pekara nya sida udah dikerandauka enggau sebengkah kompeni ari Kuching.
“Kitai endang udah bisi mai sebengkah kompeni ari Kuching beduduk ari pemujur sida nupi undang karang.
“Pia mega, kami udah mai sida ngabas endur ti nemban alai bejalaika projek nupi undang karang di Spaoh beduduk ari undang karang tu nerima peminta ke chukup tinggi ba menua luar,” ku iya.
Iya ke mega Sapit Premier Sarawak mansutka jaku nya lebuh dirandau media pengudah tembu aum enggau bala Tuai Ejensi Perintah enggau bala Tuai Rumah ba Bilik Aum Opis Pelilih Mit Spaoh, kemari.
Udah nya, Uggah nerangka, projek nupi undang karang nya mega seriris enggau tuju perintah nengeri ti benung ngaga Palan Penyangkai Bilun Menasan Pandak (STOLPort) ba Bebuling Spaoh.
”Semua nemu kitai diatu benung ngaga STOLPort ke alai tuju STOLPort tu digaga dikena mai barang ari menua tu pansut ke menua luar.
“Nya alai, kitai deka ngiga bala pedagang tauka pemekuh sektor ti ulih ngeluarka barang nguna tanah ba ditu (Spaoh).
“Siti ari produk ti deka dikemansangka ba ditu iya nya undang karang,” ku iya.
Beduduk enggau nya, iya madahka kompeni nya diatu benung ngiga endur ti nemban alai ngemujurka projek nupi undang karang ba sitak nya.
Sebedau tu projek nupi undang karang nya udah mujur dikemansangka di sitak Tarat.-TVS
