SARATOK, 7 Jan: Komuniti Tiong Hua di pelilih tu diansak patut regas agi ngaul diri ba aktiviti pemansang sereta dikerapka ulih nyadi tauke besai di Saratok.
Kaban Kunsil Nengeri (ADUN) Krian Friday Belik madah, komuniti nya mega patut regas besemekih ngerebut peluang ba pengawa dagang lebih agi ba tikas global.
“Aku ngarapka komuniti Tiong Hua di Saratok bela ulih terus bejalaika pangku pengawa diri enggau lebih chakah sereta regas agi ngaul diri ba pengawa pemansang di Saratok.
“Tadi aku bisi ngansak sida iya enti ulih ngambika sida patut chakah ngambi peluang lebih agi ba renggat global,” ku iya.
Iya madah munyi nya lebuh dirandau pengari TVS pengudah ngulu Pengawa Angkat Sumpah Kaban Komiti Ke-23 ungkup sesi 2023-2025 Kaunsil Dagang enggau Industri China Saratok ba Diwan Sri Krian, kemari.
Sama bisi datai ADUN Kalaka Mohd Duri, Presiden Kaunsil Dagang enggau Industri China Sarawak Kong Chiong Ung enggau ke bukai.
Ku terang Friday, ari pengeregas nya sida deka ulih nyadi siku orang dagang ti mujur ukai semina ulih bejalaika pengawa dagang ba Saratok tang mega ba rengat nasional tauka global jemah.
“Kebuah pia ngambika sida ukai semina ulih muka dagang sida ba Saratok aja tang deka ngasuh sida kompetitif agi ba rengat nasional enggau global.
“Ni nemu nyangka dudi ila kitai ulih meda bisi bala tauke besai ari Saratok nyadi orang dagang pemadu mujur ba rengat global,” ku iya.-TVS
