DEBAK, 5 Jan: Beduduk ari gaya hari ke suah ujan sereta ngujungka penyadi penusah bah ke nyadi ba sekeda menua dia raban kunteriktor ke bekaul dilalau chakah agi gerumban projek sapat bah ke benung digaga ba sitak Debak.
Kaban Kunsil Nengeri (ADUN) Saribas, Datuk Mohd Razi Sitam madah, naka diatu Projek Sapat Bah ke beungkus RM30 juta ke benung dipejalaika di Debak udah manggai semilan peratus tembu.
“Pemansang Projek Sapat Bah ke beungkus RM30 juta di Debak diatu benung bejalai lalu nitih penerang ari raban kunteriktor projek nya diatu udah tembu 9 peratus,” ku iya.
Iya madah munyi nya pengudah ngulu pengerami Berambih Taun Baru 2024 ke diatur Gerempung Tuai Rumah Pelilih Mit Debak ba Diwan Perpaduan ditu, ensana.
Sama bisi ngulu pengerami tu Penyanding Penemu Gerempung Tuai Rumah Pelilih Mit Debak, Penghulu Kadam Ot enggau tuai raban bansa ke bukai.
Nya alai, ku Mohd Razi, taja timpuh nembuka projek nya agi bisi setaun lebih tang raban kunteriktor bekaul patut chakah agi gawa ngambika projek nya ulih jampat agi tembu ke pemaik rayat ke diau besemak.
“Agi bisi timpuh setaun lebih alai projek tu datai ba timpuh ditaga taja pia aku ngarapka raban kontraktor ulih bebendar agi (chakah gawa) ngambika projek tu ulih jampat agi tembu.
“Tambah mega diatu musin landas nyadi nya deka ngujungka taka ai mega deka pasang. Nyadi aku ngelalau mensia mayuh ditu (Debak) anang enda bela bejejaga taja jam diatu nadai sebarang penusah tauka penanggul nyadi.
“Aku ngarapka raban kunteriktor ulih bejalaika pengawa enggau chakah agi ngambika Projek Sapat Bah tu ulih tembu enggau lengkas,” ku tandu iya.-TVS
