KUCHING, 25 Dis: Semangat penyerakup ke udah lama ditanggam dalam komuniti lebih agi di Sarawak ngemataka bemacham pengerami diintu enggau richah sereta lantang, ku Datuk Patinggi Tan Sri Abang Johari Tun Openg.
Iya madah, ba raban perintah sida seruran bejalaika pengawa enggau pengabis manah ungkup rayat lebih agi ngaul rumah sembiang.
Iya ke mega Premier Sarawak madah, tu dikena ngetanka semangat penyerakup di Sarawak.
“Nengah semangat penyerakup dalam bemacham pengarap tu, orang ke bebida pengarap enggau bansa bela bekunsi pengaga ati, pemanah Krismas nyadi pelasar bebasaka pengarap, adat enggau pengawa lama rayat Sarawak.
“Seriris enggau nya bungkur rama Sarawak, iya endang pekara ke pemadu manah digaga kitai ungkup anak Sarawak,”ku iya.
Iya mansutka pekara nya maya ngenataika Pesan Khas Krismas enggau Taun Baru 2024 ti dipancharka terus nengah TVS.
Ngelansa senentang pengawa nyendiaka rumah sembiang ke lantang ngagai rayat, Abang Johari madah, sebedau tu chukup sinu meda pendiau sekeda gerija enggau chapel.
Nya alai, ku Abang Johari perintah Sarawak ngambi perati lalu numbuhka Unit Pekara Pengarap Bukai (UNIFOR) dikena nentuka raban ke megai pengarap ukai Islam ulih besembiang ba endur ke lantang.
“Sekeda tuai ukai Islam mega udah mandangka ulah ke sama lalu beratika pemerat guna raban Islam di sitak sida.
“Ambika chunto pengari rayat di Belaga udah gerah hari mantu raban Islam dedin ngaga sebuah masjid ba sitak nya,”ku iya.
Nya alai, ku iya UNIFOR ditumbuh ukai semina dikena meri belanja tang mega dikena narak penyerakup enggau pemereti ati ba rayat pupu bansa enggau pengarap di Sarawak.
Nangkan ke nya, ari ulah ke dipandangka rayat Sarawak iya andal deka ulih mantu perintah nyapai saran pemansut Asil Kasar Dalam Menua (KDNK) manggai RM282 bilion ba taun 2030.
Ku iya, nengah Strategi Pemansang Pasca Covid-19 (PCDS) 2030, KDNK dipelaba ngerembai ari RM140 bilion ngagai RM282 bilion manggai taun 2030.
Berebak enggau nya, Abang Johari madah bisi mega bidang bukai ke ulih diserungkai lebih agi ngaul teknologi gadung enggau digital dikena ngasilka mayuh agi penatai pemisi seraya ngemayuh agi asil KDNK Sarawak. -TVS
