KUCHING, 22 Dis: Ex-Bishop Kuching, Bishop Aeries Sumping Jingan madahka, semua bantu enggau sukung ti diberi Unit Pekara Pengarap Bukai (UNIFOR) ngagai pengarap bukai endang ngayanka Perintah Sarawak chukup beratka pengelantang semua pengarap, ukai semina Islam aja.
Iya madahka, sebedau tu pengawa numbuhka UNIFOR endang udah lama diperambu bala tuai pengarap bukai nyengkaum tuai gerija, sereta iya empu ke mega siku ari kaban Gerempung Gerija Sarawak (ACS).
“Ari segi pemanah atur UNIFOR tu ditumbuh mayuh bendar pemansang gerija ba sekula ke udah diaduka UNIFOR.
“Ambika banding ba taun ari taun 2020 ngagai taun 2022 sida perintah bisi ngungkupka 50 juta setaun.
“Taun tu 2023 sida meri bajet RM100 juta ungkup pemansang gerija di sekula (misyen),” ku iya seraya muji ejensi keterubah ditumbuh di Malaysia dikena nyaga pengelantang pengarap ukai Islam di menua tu.
Bishop Aeries mansutka penemu nya nengah program Dialog TVS ke dibantai malam kemari.
Nangkan ke nya, iya bisi ngelalau semua komuniti Kristian terus negutka kaul penyerakup enggau basa ngagai pangan diri sereta pengarap bukai sereta nulak pekara ti tau ngasuh belaya enggau beserekang penemu.
“Kitai patut bebasaka jalai pengarap pangan diri. Enda tau ngemelika orang, mantah pengarap lama, laban kitai empu pan enggai dikemelika orang.
“Kitai mesti besabar, enti utai nya bisi enda betul. Tau bejaku manah. Anang ngaga laya ari utai nya,” ku lalau iya.
Kelimpah ari nya, iya mega mekat bala komuniti Kristian seruran baruh ati, anang kelalu tinggi jaku sereta tebuka ati nerima buah penemu ari pangan diri, laban nya siti pemanah ke mesti dikembuan kitai ti nyadi anak mensia.
Ba pengujung randau lebuh dipinta ngelansa senentang pemansang menua Bishop Aeries ngarapka perintah terus negapka peneras arus internet di menua ulu awak ulih ngemuntang bala anak sekula di menua ulu. Baka ngaga 5G ke chukup beguna ngagai rebak diatu.
Kelimpah ari nya, Bishop ngarapka perintah terus ngetanka pemanah rampa menua sebaka enggau atur terit ke digaga menua Barat.
Iya madah diri chukup sinu ati menua diatu nyau balat kusi, sungai nyau keruh, ikan nyau kurang sereta burung pan nyau jarang amat didinga.
Enda tinggal mega, Bishop bisi ngelalau raban nembiak anang ngelusu macha sereta begigaka penemu laban ku iya siti pemanah pengawa macha iya nya manah ke pengerai runding enggau ulih nyeliahka penyakit jampat lupai.-TVS
