KUCHING, JUN 29 : Bisi 12 iku Peranak Tama Nadai Pemendar (PATI) ari Indonesia nyengkaum empat iku nembiak enggau tiga peranak menua luar udah ditangkap raban Gerakan Am (PGA) Batalion ba dua bengkah operasyen maya hari satu.
Tuai Polis Pelilih Serian DSP Aswandy Anis madahka, keterubah iya sida udah ngetan dua kerita ba siti operasyen di Kampung Tebekang Dayak urung pukul lima.
Ku iya, asil ari peresa tetemuka kedua-dua kerita dibai dua lelaki peranak menua tu berumur 34 enggau 37 taun ti nyadi tekong darat.
“Peresa ke silik tetemuka bisi 11 iku pisinjir peranak Indonesia iya nya tiga lelaki enggau empat iku orang indu sereta empat iku anak mit, lalu kesemua nadai dokumen pengelala diri ti sah,” ku Tuai Polis Pelilih Serian, DSP Aswandy Anis ba siti penerang sehari tu.
“Kesemua sida nyengkaum dua iku peranak menua tu ditan ngambika bejalaika ke tasat,” iya nambah.
Ku iya, tasat keterubah tetemuka semua pati nya tama ke Sarawak nengah jalai tikus di pelilih Malikin nuju ke Bintulu.
Nangkanka nya, pengawa nangkap ti kedua diripotka di pelilih Ladang Sawit Tetangga Akrab Serian iya nya urung pukul 7.40 malam.
Raban operasyen maya nya ngetan kerita, sereta asil ari peresa tetemuka kerita dibai siku lelaki peranak menua tu ti berumur 33 taun dipelaba nyadi tekong darat.
Kelimpah ari nya, ku iya madah, bisi siku peranak Indonesia ditemu dalam kerita nya.
“Pansik ke silik tetemuka siku lelaki Indonesia nya nadai dokumen pengelala diri ke sah.”
Nangkanka nya, kesemua tiga tekong darat nya ditasat ba baruh Seksyen 26a Akta Anti Pemerdagangan Orang Dan Penyeludupan Migran (ATIPSOM) 2007.
Kelimpah ari nya, kesemua 12 PATI ditasat ba baruh Akta Imigresen.
“Operasyen nagang penama peranak menua luar terus dipejalaika serat diteritka dikena nyeliahka pengawa tama nadai pemendar.” ku iya nambah.
