SARATOK, 17 Dis: Urung 30, 000 iku temuai disadang datai ngerichahka pasar Saratok nyerumba pengerami ‘Saratok New Year Countdown’ 2024.
Kaban Kunsil Nengeri (ADUN) Krian Friday Belik madah diri andal program nya deka nerima sukung ari mensia mayuh laban tu keterubah iya pengerami nyambut taun baru diatur sechara besai di Saratok.
“Kitai melabaka penyampau mensia mayuh ke bisi datai maya nya ila entara iya 20,000 ngagai 30,000 ngulu pengerami ke berengkah 16 sampai 31 Disember.
“Kebuah pia laban pengawa nyambut taun baru sechara besai udah lama enda diatur ba Saratok,” ku iya.
Friday ke mega penyanding penemu Saratok New Year Countdown 2024 madah munyi nya lebuh dirandau pengari TVS empai lama ke udah.
Ku terang Friday, mensia mayuh dipelabaka sigi lama udah nganti program baka nya.
Nya alai, iya endang nyadang mensia mayuh datai laban berepak enggau kemisi nembiak sekula.
Udah nya, Friday madah mayuh program enggau aktiviti ngaul mensia mayuh udah diperambu deka diatur ba sepemanjai timpuh dua minggu program nya diatur.
“Mayuh program udah dirintaika bala komiti baka ‘Battle Of The Band’.
“Udah nya, nyambut mantar taun baru 31 haribulan iya nya kiraka pengujung pengerami,” ku iya.
Iya madahka komiti pengatur pengerami bisi muka bansa asal bejual ungkup bala pedaja bejualka barang pemakai enggau produk bukai.
“Arapka program tu mujur lalu sama-sama mih kitai berami nyambut penatai taun baru taun 2024,” ku nerang nyemetak.
Entara penanyi ke disadang datai ngerichahka malam ngintu taun baru tu ila iya Nya Lucy M, Winnie Albert, Raban Band Tebilang XPDC enggau Ritz Metalasia ari Semenanjung.-TVS
