SPAOH, 14 Dis: Program Lumba Rebak Fun Run ti mujur diatur kena 1O Disember tu tadi deka diatur manah agi dudi hari.
Chairman Kelab Nembiak Pasar Debak ( KBPD) Abg Mohd Amirul Afaed madah diri chukup tepantup ati meda timbal ari mensia mayuh ke bisi ngambi bagi ba program nya.
Ku tandu Abang Mohd Amirul iya enda nyadang penyampau penyereta ulih manggai 120 iku iya ngelui ari saran asal ke semina melabaka penyereta manggai 50 iku aja.
Nya alai, iya madah ungkup edisyen nangkan tu ila dia Program Rebak Fun Run tu deka diatur manah agi baka nyendiaka menasan ke lebih nguji pengelandik raban penyereta.
“Nyadi ba edisyen kedua ila kami deka ngatur Rebak Fun Run enggau lebih mar sereta manah agi ba sukut menasan penyereta awakka ulih nguji pengelandik enggau pengulih penyereta ba edisyen kedua ila,” ku iya.
Iya mansutka pekara nya pengudah tembu Program Lumba Rebak Fun Run 2023 renggat keterubah diatur ba Gelangang Futsal Riveria di Debak empai lama.
Ke penerang, program lumba nya dibagi ngagai dua kategori iya nya kategori 10 kilometer enggau 5 kilometer ungkup pemekit lelaki enggau indu.
Champion kategori lelaki 10 kilometer dipenggi Syahrullah Safri lalu champion kategori indu dipenggi Yong Yee Ling.
Udah nya, champion ungkup kategori 5 kilometer lelaki dipenggi Donny Albert, lalu champion kategori indu dipenggi Lau Moi Chee.
Semua bala pemenang bela nerima perais mata duit sereta midul. Sama bisi datai Pegawai Nguasa Pelilih Mit Debak (SAO) Hafiz Kepli, Pegawai Opis Nembiak enggau Lumba Bagi Betong, Nurul Zamzam Shafie enggau ke bukai. -TVS
