SPAOH, 12 Dis: Karnival Spaoh deka diatur baru ba taun 2024, ku Dr Richard Rapu.
Kaban Parlimen Betong nya madah, Sapit Premier Sarawak ti mega Kaban Kunsil Nengeri (ADUN) Bukit Saban Udah udah setuju deka ngatur program ke sama ba taun baru dikena nyungkak ekonomi perayat di Spaoh.
“Tu kira karnival enggau mayuh macham program sereta aktiviti udah diatur enggau lanchar baka ke udah dipadah Datuk Amar (Douglas Uggah Embas) kemari.
“Datuk Amar madah enti orang Spaoh, Bukit Saban agi deka, kitai ulih ngatur taun baru. Enti ulih (arapka) ninting dua bulan (bisi) diatur mini karnival baka tu,” ku iya.
Iya bejaku munyi nya lebuh nutup Karnival Spaoh 2023 ba Diwan Mensia Mayuh di Spaoh kena Hari Minggu tu tadi.
Berindik ari nya, Dr Richard mega meransang mensia mayuh di Spaoh sama nyukung lalu ngambi peluang ari program nya dikena ngulihka penerang bekaul bantu, pengawa puang tauka pekara pelajar ke bisi disediaka ejensi ke bisi ngambi bagi dalam karnival nya.
“Tuju iya awak ke kitai ulih ngedut agi pemanah kaul antara rayat pupu bansa di Bukit Saban sereta Spaoh.
“Program baka tu, keterubah iya kitai meda bisi kaunter dibuka raban ejensi perintah.
“Chunto, sida ari Opis Pengintu Pengelantang Pendiau udah limpang nurun kitu, nyadi ambi mih peluang ngulih tauka betanya senentang bantu ari sida,” ku iya.
Bisi 14 bengkah ejensi perintah enggau peribit nyengkaum Centexs Betong, Kolej Komuniti Betong, Opis Pengerai (KKM) Betong, Opis Pengintu Pengelantang Pendiau Mensia Mayuh (JKM), SEDC, Pedi, JPN enggau Kaunsil Pelilih Betong (MDB) bisi ngambi bagi ba program nya.
Karnival Spaoh 2023 diatur sepengelama tiga hari berengkah 8 nyentuk 10 Disember tu tadi.
Sama bisi datai Sekretari Politik Premier Sarawak, Roselind Mapong Sabai, Sekretari Kaunsil Pelilih Betong (MDB), Lister Clement Guwie, Pegawai Nguasa Pelilih Mit Spaoh, Denny Lim enggau ke bukai.-TVS
