SARATOK, 9 Dis: Kaban Kunsil Nengeri (ADUN) Krian Friday Belik ngarapka Projek Ngaga Baru Opis Pelilih Mit Nanga Budu ulih dipejalaika enggau lengkas ungkup pengelantang raban pengereja pengawa ba opis nya.
Ku iya diatu projek nya benung ba renggat kepenudi nyendiaka pelin sereta dipelaba deka ditinda ba suku keterubah taun baru (2024).
“Ba Pelilih Mitl Nanga Budu (penembu projek tu) nyangka ulih dipeda kitai dalam tiga empat taun ke deka datai.
“Kebuah pia laban aku ninga opis baru di Nanga Budu pan dalam proses nyendiaka pelin.
“Nya alai, udah tu ila dalam suku keterubah taun 2024 (projek nya) deka ditinda,” ku iya.
Iya madah munyi nya pengudah Program Randau enggau Pengari Rayat ke diatur Sekula Primari (SK) Temudok Awik bepalan ba diwan sekula nya empu, empai lama.
Nya alai, Friday ngarapka projek nya ulih tembu lengkas ngambika mayuh agi pemansang ulih dikemujur lebih agi ba sitak menua Ulu Krian enggau Nanga Budu.
“Pelilih Mit Nanga Budu kebendar udah lama diaku nyadi pelilih mit tang naka diatu lalu bedau bisi begunan opis ke menyana.
“Nya alai, bala kaunsil, staf ke gawa semina numpang ba kuartes lama ke enda entu nemban tauka enda entu lantang alai sida ngatur pengawa kelimpah enda setipak enggau status Nanga Budu ke nyadi pelilih mit,” ku iya.
Beduduk ari nya, Friday ngarapka juluk iya deka meda pelilih menua nya ngembuan opis pelilih kediri deka nyadi nyata enda lama agi.
Ku terang iya, pengawa ngaga opis nya chukup beguna ngambika mayuh agi pemansang ulih diatur ungkup rayat ke nguan menua Ulu Krian enggau Nanga Budu.-TVS
