SARATOK, 8 Dis: Kaban Kunsil Nengeri (ADUN) Krian Friday Belik nyukung penuh sereta muji perambu Perintah Sarawak ti deka ngaga baru opis enggau kuartes ungkup orang gawa perintah di menua tu berengkah taun 2024.
Nya alai, iya arapka perambu nya ulih dipejalaika enggau lengkas ke pemaik sereta pengelantang raban orang gawa perintah di menua tu.
“Arapka perintah Sarawak ulih jampat agi ngaga lalu bejalaika atur kena ngaga kuartes tauka opis ba menua kitai di Sarawak ditu.
“Bisi (staf perintah) ke bepemisi nyewa tang suah agi sida nya nulak enggai dipindahka ngagai menua ke nadai alai diau.
“Nyadi tu mih penanggul ba sida (nadai kuartes ke menyana).
“Nya kebuah perambu ke udah dipadahka perintah nya siti atur ke manah laban nya enda masau tanah kelimpah perintah pan senang deka nyendiaka ukai semina kuartes tang pusat alai sida bemain tauka ngelantang ati,” ku iya.
Friday mansutka jaku nya lebuh meri timbal senentang perambu perintah Sarawak ti deka ngaga baru opis enggau kuartes pengereja pengawa perintah berengkah taun 2024 munyi ke udah dipadahka Sekretari Perintah Sarawak, Datuk Amar Mohamad Abu Bakar Marzuki lebuh bejaku ba sebengkah pengerami di Sri Aman sebedau tu pengudah Program Randau Begulai Enggau Pengari Rayat ke diatur Sekula Primari (SK) Temudok Awik, kemari.-TVS
