SARATOK, 8 Dis: Pegawai Opis Pengerai Bagi Betong Dr Mohamad Norhaizan Ahmad Narawil ngelalau bala apai indai enggau pengajar di Betong sama beratika pengerai anak tauka nembiak ke dijaga sida berindik ari penyadi kes Penyakit Jari, Kaki enggau Mulut (HFMD) ke majak niki di menua tu.
“Trend Penyakit Jari, Kaki Enggau Mulut (HFMD) tu dipeda bisi niki dalam timpuh seminggu dua tu.
“Nya alai aku minta ngagai mensia mayuh lebih agi bala apai indai nembiak enggau pengajar bela beratika kelai baka meletur ba mulut, gelata ba jari enggau kaki tauka bisi tabin.
“Nyadi bala nembiak ke bisi ngembuan kelai baka tu enda ibuh diasuh begulai enggau nembiak bukai ba sekula tauka palan ngibun anak mit (Tadika enggau Taska),” ku iya.
Iya mansutka pekara nya pengudah tembu Program Beperesa Pengerai Ungkup Komuniti Kampung Kaba ke dipenyadika Kaban Kunsil Nengeri (ADUN) Kalaka Mohd Duri, empai lama.
Kelimpah ari nya, Dr Mohamad Norhaizan nangkan, mensia mayuh lebih agi ba pelilih Betong mesti nemu tanggung pengawa diri ngambika pengerekai penyakit HFMD ulih ditagang.
“Aku ngarapka kitai ulih ngembuan siti ulah pangku pengawa taja kitai kiruh enggau pengawa ninting hari.
”Enti anak kitai bisi kelai HFMD, kita (apai indai) anang nganjung sida sekula tauka palan pengibun nembiak mit.
“Sida patut diteju (belelak) diau ba rumah tauka diserara ari begulai enggau nembiak bukai ngambika pengerekai igi penyakit tu ulih ditagang,” ku iya.
Ke penerang, berengkah ari bulan Januari nyentuk 11 November tu tadi penyampau kes penyakit HFMD dirikodka ba pelilih Betong aja bisi 468 kes.-TVS
