SARATOK, 8 Dis: Projek ngaga baru jelatung tauka pontoon penyangkai perau ba Sungai Krian diatu benung ditinda.
Kaban Kunsil Nengeri (ADUN) Krian Mohd Duri madah, proses tinda nya deka dipejalaika nyentuk 13 Disember tu.
“Waf jelatung udah ditinda lalu tinda deka ditutup kena 13 Disember tu.
“Nitihka penerang ari JKR pengawa ngererak jelatung tauka pontoon ke lama udah berengkah dikereja tang nyangka begunaka awak mimit ngarapka ba taun baru projek tu ulih berengkah sepengudah proses tinda bejalai nyadi tu siti berita manah ngagai kitai,” ku iya.
Iya madah munyi nya lebuh nerangka pasal projek nyeleti jelatung ba tebing Sungai Krian ke balat udah rusak pengudah bejadika Proram Beperesa Pengerai Ungkup Komuniti ba Kampung Kaba, empai lama.
Taja pia, ku Mohd Duri, iya arapkaprojek nya ulih berengkah enggau lengkas ungkup pengelantang rayat ari tiga bengkah rumah panjai enggau penguna bukai ke bejalaika pengawa ninting hari.
“Maya Aum Dun apin lama aku pan bisi berandau enggau sida JKR mega betemu enggau direktor JKR minta projek tu digaga enggau jampat.
“Pontoon tu beguna bendar ungkup mensia mayuh lebih agi perayat ari Rumah Panjai Selambung, Rumah Panjai Entebu enggau genturung menua besemak dikena sida kuang kuit ari seberai,” ku iya.
Sama bisi datai nyempulang pejalai ADUN Kalaka iya nya Pegawai Opis Pengerai Bagi Betong, Dr Mohamad Norhaizan Ahmad Narawil, Tuai Balai Bomba Enggau Penyah Penusah (Bomba) Saratok, Putra Ila, bala tuai raban bansa enggau ke bukai.-TVS
