PUTRAJAYA, 8 Dis: Mayuh rayat Malaysia alah tipu raban ejen ngambi orang gawa ba menua luar nyentuk bisi bebadi nyawa ketegal dijamah.
Sapit Menteri Besai, Datuk Seri Fadillah Yusof madah, tebal agi sida tu alah ditipu ejen ngambi orang gawa, teperasa meda iklan ke bisi ayan ba media rama lalu ngujungka sida dipejal nyadi ‘scammer’.
“Nya kebuah kitai nerima bisi nerima bemacham mesej dalam Jaku Melayu ke manah ari menua luar laban sida (rayat Malaysia) ke dipejal nyadi scammer.
“Aku empu mayuh udah nulung baka anak Sarawak ti kena tipu ba menua luar lalu ungkus mai sida tu pulai ukai mimit, bisi mega sekeda nya udah mati ketegal dijamah,” ku terang iya.
Iya madah munyi nya maya bejaku ba Pengerami Nutup Roadshow Anti-Scam Nasional 2023, kemari.
Nya alai, Fadillah ke mega Menteri Pengawa Bekebun Enggau Komoditi nangkan rayat Malaysia anang mudah teperasa meda iklan gawa ke ayan ba media rama, pia mega iya ngelalau mensia mayuh mesti peresa dulu nentuka pengamat iklan ba raban ke bekaul.
Berebak enggau nya, Fadillah madah penambah penyampau aktivis, pengintip enggau soldadu siber ke dilatih ngembuan pengulih ngerusak servis enggau operasyen perintah sereta organisasyen lalu pekara nya chukup ngirauka ati.
Ku iya, pemansang teknologi ba jeman digital udah muka peluang ngagai pejenayah wang tauka ‘scammer’ manjuk mensia mayuh nengah bemacham jaku manis ti ngujungka raban orang ke ditipu rugi besai.
“Nyadi perintah patut seretai nyingkang ke mua nengkira diri enggau bemacham chara ke lebih nemban dikena napi pemar jenayah siber ke majak nyadi,” ku iya.
Iya madah, institusi bank, ejensi penerit adat enggau pengelikun terus nempa kerejasama mutarka isu tu nengah chara bejalaika undang-undang enggau atur baru dikena mutarka jenayah nipu wang enggau lebih ngasi.
Statistik Opis Pansik Jenayah Komersial Bukit Aman mega mandangka rikod kes jenayah dalam tali arus niki sepenyampau 37 peratus ungkup timpuh Januari nyentuk November 2023 dibanding timpuh ke sama taun 2022 iya nya ari 23,608 kes ngagai 32,366 kes lalu tu ngaul pengerugi manggai RM1.13 bilion.
Program Roadshow Anti-Scam Nasional ke berengkah bulan Februari taun tu tadi dipejalaika dikena meri penerang enggau nerenak pemereti ati ngagai bala penguna internet pasal jenayah dalam tali arus.-TVS
