Kuching, 27 Jun – Lima genturung pendiau ti nyengkaum tiga buah rumah panjai bejalaika Atur Nagang Pemindah Diteritka (PKPD) naka hari enam.
Komiti Mutarka Penusah Ngenyit Nengeri (JPBN) Sarawak madahka, genturung pendiau nya ngaul Rh. Nancy, Marup Atas, Engkelili, Lubok Antu; Rh. Langkop, Marup Atas, Engkelili, Lubok Antu; Setinggan Jalai Kidurong, Bintulu sereta rumah suwa atas kedai Jom Ngeteh, Bintulu.
“Keempat-empat genturung pendiau tu bejalaika timpuh PKPD ti berengkah diteritka ari 26 hari bulan 6 nyentuk ke 9 hari bulan 7 2021.
“Seraya sebuah agi genturung pendiau bejalaika PKPD ba pun ari 27 hari bulan 6 nyentuk ke 10 hari bulan 7 2021 iya nya Rh. Mendali, Buyong Panjai, Betong,” ku JPBN madah ba dalam siti penerang maya hari enam.
Berebak ari nya, JPBNS madahka, atur PKPD nya dipejalaika dikena nagang pengekai igi penyakit COVID-19.
Jpbns mega madahka, dua genturung pendiau udah abis bejalaika pkpd naka hari enam.
Genturung pendiau nya ngaul Rh. Mambong, Nanga Lingah, Julau sereta Rh. Robert anak Pengabang, Sebauh.
Kelimpah ari nya, Opis Menteri Kaunsil Kandang Menua enggau Pengawa Berumah Sarawak udah ngeluarka tiga kompaun ba baruh endur ke dijaga mayuh macham ejensi kaunsil kandang menua.
Kompaun ke dikeluarka nya ketegal penyalah enda ngemaruka bup rejister tauka bup rejister ti nadai ngayanka penerang ke silik.
Tu nyadika penyampau semua kompaun ti dikeluarka PBT kenyau ari 1 hari bulan 2 nyentuk ke 26 hari bulan 6 iya nya 1,166 kompaun.
