KUCHING, 3 Dis: Tuai Akademi Serakup Dayak Iban Sarawak (ASADIA), Mabong Unggang meransang rebak baru terus bebendar agi negi, ngidup enggau ngelakuka main asal Dayak bepelasarka penemu ke udah dipelajarka sida ari kelas main asal ASADIA.
Ku iya, taja udah tamat kelas tang nya ukai reti iya pengawa ngetanka seni main asal nya diketu tang kebendar nyadi pemungkal dikena ngerembaika main asal nya.
“Taja sehari tu program tu dikumbai kitai tamat kelas main asal tang ukai reti iya nyadika kepenudi tang kebendar pemungkal ngagai semua kitai ngetan, ngidup sereta ngelakuka budaya main asal kitai Dayak,” ku iya maya bejaku nyerumba pengawa Beserumpu Ngerami Tamat Kelas Main Asal Asadia Taun 2023 diatur ba Balai Raya Gerempung Bansa Dayak Bidayuh (DBNA) di Jalai Ong Tiang Swee ditu, malam tadi.
Udah nya, ku terang Mabong bisi sekeda main asal Dayak lebih agi ba komuniti Iban udah lenyau lalu enti rebak baru nadai pengeransing deka ngidupka baru main asal nya dia main asal nya deka terus lenyau.
“Bisi sekeda seni enggau main asal kitai udah lenyau ngelama tu enti rebak baru nadai pengeransing deka ngetan enggau ngidupka baru seni main asal tu dia iya deka terus lenyau selama iya,” ku iya.
Ke penerang sekeda ari kereban seni muzik Iban ke nyau deka lenyau tauka nadai tentu dikelala rebak baru iya nya nebah belikan enggau nyepu engkerurai.
Nya alai taun baru, ASADIA merambu deka muka kelas bemain engkerurai dikena ngidupka main asal nya.
Berebak enggau nya, Mabong meri terima kasih ngagai Sapit Premier Sarawak Datuk Amar Douglas Uggah Embas taja enda sempat datai ngulu pengerami nya ketegal bisi pengawa ba endur bukai iya bisi ngagihka belanja sepenyampau RM30, 000 dikena ASADIA ngatur aktiviti ba taun baru.
ASADIA, ku iya ukai semina bisi muka kelas main asal ba Indu Opis SADIA di Batu 7, Kuching tang mega bisi muka kelas main asal ba endur bukai baka ba Batu Gong, Siburan enggau Saratok (Kelas Ngaga Sugu Tinggi engga Kain Burie) diatur ba rumah panjai.
Ngelansa pengerami malam nya, urung 280 iku penyereta kelas main asal asadia bela nerima setipikit diri ngaul Kelas Main Asal Ajat Indu Iban Renggat 15, Ajat Pua Kumbu Renggat 16, Ajat Lelaki Iban Renggat 15, Kelas Ngaga Kain Burie, Kuntau, Kelas Belikan, Sape, Gendang Pampat, Tanda Orang Ulu (Datun Julud), enggau Kelas Tanda Bidayuh.-TVS
