SARATOK, 3 Dis: Kaban Kunsil Nengeri (ADUN) Kalaka Mohd Duri madah, projek Rumah Jelan Rega tauka ‘Rumah Mampu Milik’ (RMM) deka digaga ba tanah puang ke agi bisi ngerimbai Taman Seroja Indah ditu.
Ku iya projek RMR nya endang patut digaga ungkup pengelantang rayat lebih agi sida ke gawa enggau ke diau mendam ba Saratok ngambika bela ngasaika diau ba rumah ke lantang baka ba menua bukai.
“Nyadi aku ngasaika rayat di Saratok lama udah nganti baka ni pengujung tanah puang besemak enggau buding tu ke apin bisi rumah.
“Nya alai, aku deka nguji berunding enggau sida HDC dulu ngambi ulih ngaga siti genturung pendiau tauka ngaga Rumah Jelan Rega, chunto (projek) Pertiwi digaga di Saratok awak ke mensia mayuh di Saratok ulih ngasai lalu ulih meli rumah ke dikeingin sida,” ku iya.
Iya madah munyi nya lebuh dirandau pengari TVS pengudah bejadika Diwan Mayuh Guna Taman Seroja Indah Kerupok ditu, empai lama.
Nangkan ke nya, lebuh ditanya sekalika RMM nya mega deka digaga ba alai bukai ke besemak enggau Pasar Saratok Mohd Duri madah, pekara nya mega deka dikerandau dulu enggau Opis Pemansang Pengawa Berumah (HDC).
“Enti kitai berati ari sukut baka rumah Spektra Pertiwi lebih kurang baka nya.
“Nya kebendar siti produk (projek rumah) ke mayuh digaga ba Sibu ba Spaoh enggau ke bukai.
“Nyadi aku ngarapka nengah pemisi tanah diempu HDC ke agi mayuh puang kitai ulih berunding enggau HDC ngaga siti skim rumah ke ulih ditangkup mensia mayuh sekalika sida bisi pengawa tetap tauka mendam di Saratok,” ku iya.
Ke penerang, projek ngaga Diwan Guna Mayuh ba Taman Seroja Indah di Saratok ke beungkus RM600,000 tu berengkah dikereja kenyau ari 2018 tang tejanggal ketegal pengerekai pandemik Covid-19.-TVS
