DEBAK, 1 Dis: Raban pengajar lebih agi di pelilih Debak bela muji pemanah atur meri bantu laptop enggau baucher bup ungkup nembiak ke belajar ba Palan Pelajar Tinggi (IPT) di menua tu.
Ku Pengajar Loleh Ibrahim, pemutus meri bantu baucher bup enggau laptop ngagai nembiak ari ruang bilik kurang bepemisi (B40) ke belajar ba IPT siti atur ke nemban.
“Pekara ke dibantaika YAB Premier Sarawak tu chukup meri pengaga ati ngagai kami iya nya meri Laptop pechuma enggau Baucer Bup ngagai nembiak ke nampung pelajar sida ba IPTA.
“Tu endang berita ke chukup manah ungkup kami lalu aku ngarapka enggau pemeri tu ila deka nyadi peransang ngagai bala nembiak ngambi ke lebih lati agi belajar,” ku iya
Iya madah munyi nya maya dirandau pengari TVS lebuh dipinta meri timbal bekaul enggau bantu laptop enggau baucer bup ungkup nembiak di menua tu ke belajar ba IPT dipansutka Premier Sarawak Datuk Patinggi Tan Sri Abang Johari Tun Openg maya mantaika Bajet Nengeri Sarawak 2024 empai lama.
Udah nya, ba penemu Pengajar Mohd Sahrul Azha Sulong iya ngarapka proses tauka atur meri bantu nya ila ulih dipejalaika enggau lurus.
“Ba aku pemutus enggau penerang nya siti singkang ti manah sereta engkeman ungkup nembiak lalu arapka atur nya ila dialuska agi ngambika pemeri nya ila ulih meri peransang sida ke endang patut aja dikena nyeliahka pemeri dibasau ngagai penerima ke enda patut,” ku iya.
Kepenudi, Pengajar Ameliana Geruka ngarapka mayuh agi nembiak ari menua pesisir ulih sama ngambi peluang tu dikena ngemansangka diri dalam bidang pelajar udah tu.
“Pekara ke udah dibantaika Premier nya amat manah ngagai anak kitai Sarawak lebih agi anak Iban ke ba menua pesisir.
“Kebuah pia, laban sebedau tu enti kitai meda anak Iban tu iya enda entu ulih enggau orang bepekit enggau orang masuk U (universiti) laban kurang ari segi penatai pemisi, nadai duit dikena nyambung sekula.
“Nyadi aku ngarapka semua nembiak Sarawak ngambi peluang tu kita mesti nyambung pelajar diri lali nadai kedalih agi enda ulih belajar ba universiti udah tu,” ku iya.-TVS
