Tatau, 26 Jun – Kes COVID-19 enggau kluster baru ke majak nambah di pelilih Tatau dipeda ba tikas ke ngirauka ati.
Beduduk ari nya, rayat di pelilih nya dilalau terus ngasika Standard Atur Pengawa (SOP) ke udah ditetapka.
Tuju tu dikena nagang sereta ngurangka kes berampit covid-19 sereta mantu ngemunaska pengekai igi penyakit nya.
Ku Pemangku Pegawai Pelilih Tatau, Calvin Ligong madah, kes COVID-19 ngayanka penambah kes lalu nyentuk ke hari lima bisi 10 kluster agi aktif di pelilih nya.
“Ba hari bukai sebedau tu kitai meda kes majak nambah lalu tiga hari ke udah kitai meda mayuh kluster baru ditukuka di pelilih tatau. Nengah awak tu aku ngelalau komuniti di menua pesisir enggau semua peranak terus ngasika SOP. Tebal agi, sida ke diau di menua ulu.”
Calvin madahka, gaya kes COVID-19 di pelilih Tatau diatu kes mayuh dirikodka di menua ulu tauka di menua pesisir, lebih agi di rumah panjai.
Iya madahka pekara tu ngirauka ati lalu rayat di Tatau mesti nyaga pengelikun enggau pengerai diri sereta enda ngaga aktiviti ke enda dikemendarka sepemanjai timpuh atur nagang pemindah (PKP).
Nangkan ke nya, Tuai Polis Pelilih Tatau, James Reis mega nangkan peranak di Tatau terus diau ba rumah seraya meri kerejasama ti rat ngagai Komiti Pemansang enggau Pengelikun Genturung Pendiau (JKKK) di rumah panjai.
“Aku minta semua peranak terus diau di rumah sereta minta kerejasama ari AJK di rumah panjai nentuka rayat sida enda pansut sepeneka ati nadai pekara ke berat ba luar. Polis deka terus nambahka patau pengasi ke SOP enggau mensia mayuh ke enda nitihka pekara tu deka dikompaun enti sema enda nitihka SOP ke ditetapka nyentuk ke sehari tu.”
Hari lima kemari, Opis Pelilih Tatau nyuaka pemeri ngagai pekereja di luan ba dua endur empang jalai alun di Tatau.
Naka ke diatu, empang jalai alun bisi ba KM18 Batu Katak Jalai Tatau, Sibu enggau jalai tebing tasik Kuala Tatau.
