KUCHING, 26 Nov: Kaban Kunsil Nengeri (ADUN) Krian Friday Belik madahka Bajet Sarawak 2024 ke dibantaika Premier Sarawak Datuk Patinggi Tan Sri Abang Johari Tun Openg siti chara dikena perintah Gabungan Parti Sarawak (GPS) bekunsika baru pengulih belanja perintah nengeri enggau rayat di nengeri tu.
Ku iya madah, bajet Sarawak nya mega siti chara dikena perintah GPS malas sukung ke udah dipandangka rayat ngelama tu.
“Bajet tu tau dikumbai kitai manah ngingatka sukung rayat ngagai kitai di Sarawak ditu.
“Nya alai tau dikumbai kitai meri pulai tauka bekunsika belanja ke udah diulihka menua Sarawak diberi pulai ke ngagai rayat ari segi projek-projek pemansang nyadi deka mayuh agi (pemansang) dipulaika baru ngagai rayat,” ku iya.
Friday madah munyi nya lebuh dirandau pengari TVS ba Begunan Kunsil Nengeri (DUN) Sarawak lebuh Hari Empat.
Nangkan ke nya, Friday arapka Bajet Nengeri 2024 ke udah dibantaika nya ulih dikena ngemujurka mayuh agi projek pemansang lebih agi ba sitak dun krian.
“Ngarapka peruntukan tu ulih dikenataika dalam taun baru tu ila kena kitai ngaduka mayuh agi projek-projek ba kitai di Krian iyaka endang nyadi fokus aku dikena nambah lalu ngemanahka agi jalai ba menua ulu.
“Mayuh udah dalam rintai ti deka disebut tu lagi lalu nambahka nya deka ngaduka sekula enggau ngaduka klinik-klinik kitai ba menua ulu kelimpah kitai mega deka ngangkatka agi ekonomi (rayat) ba Krian,” ku iya.-TVS
