SARATOK, 16 Nov: Sekeda pengari penerima geran Projek Mit Menua Pesisir (MRP) Kunsil Nengeri (DUN) Krian madah diri chukup gaga sereta meri terima kasih besai ngagai ADUN Krian Friday Belik.
Tuai Rumah (Tr) Malong Atas ke mega ex-Kaunselor Kaunsil Pelilih Saratok (MDS) Insol Untang madah diri berasai gaga lalu tu kedua kali sida serumah nerima bantu MRP nya.
“Tu kali kedua udah nerima MRP ari YB (Friday Belik) lalu sebedau tu agih RM6, 000 diatu nyadi RM8,000.
“MRP tu chukup besai guna ba kitai di menua pesisir. Nya alai, kami berasai chukup temegah ati,” ku iya maya dirandau pengari TVS pengudah tembu pengawa nyuaka MRP nya ditu, kemari.
Udah nya, Chairman Gerempung Apai Indai Enggau Pengajar (PIBG) Sekula Primari (SK) Kalaka Central Saratok Ating Anteri, 57 madah, enggau pemisi agih MRP nya sida ulih ngatur ngatur mayuh agi aktivit ke pemaik sekula.
“Terima kasih ngagai YB Friday Belik laban udah mantu SK Kalaka Central.
“Projek MRP tu manah laban nya mantu kami ngaduka aktiviti, nyadi kami berasai gaga laban bisi duit dikena ngatur pengawa ba sekula,” ku iya.
Ungkup penemu, ba pengawa nya urung RM372, 500 geran MRP udah disua ngagai 44 iku pengari penerima mungkur 11 JKKK, 17 serakup sereta kelab, 6 biro indu, 9 PIBG enggau sebuah gerija.-TVS
