DEBAK, 8 Nov: Naka tu agi nadai sebarang isu tauka kes jenayah berat diripotka nyadi ba pelilih mit Debak, ku Dato Mohd Azman Ahmad Sapri.
Kepala Polis Sarawak nya madah taja pia, raban polis deka terus komited meri servis pemadu manah ungkup pengelikun mensia mayuh di menua nya.
“Bepelasarka rikod naka tu agi nadai sebarang isu ke ngirauka ati di Debak, pengelikun mensia mayuh agi ulih jaga.
“Taja pia, raban polis deka terus bejalaika pengawa enggau pemadu manah ungkup rayat Sarawak bepelasarka integriti enggau atur pengawa ke udah ditetapka,” ku iya maya bejadika Balai Polis Debak ke baru, kemari.
Nangkan ke nya, Kaban Kunsil Nengeri Saribas Datuk Mohd Razi Sitam lebuh bejaku ba pengawa nya madah pemujur niri ke Balai Polis Debak ke baru nya chukup besai reti ngagai iya.
Ku Razi, kebuah pia laban projek ngaga Balai Polis Debak nya mih keterubah dipinta iya lebuh baru dipilih nyadi pengari rayat ungkup Kunsil Nengeri (DUN) Saribas.
“Balai tu pengujung iya mujur dipenyadika sechara rasmi lalu ba penemu aku kediri berasai gaga laban munyi ku orang laban balai polis tu mih keterubah dipinta aku lebuh aku mujur dipilih nyadi pengari rayat ditu (Saribas) suba,” ku iya.
Ungkup penemu, Balai Polis Debak ke baru nya berengkah digaga kena 5 Oktober 2016 lalu tembu 15 Oktober 2018 ngena ungkus sepenyampau RM17,344,943.
Sama bisi ngulu pengawa nya Sapit Kepala Polis Sarawak Dato Mancha Ata, Tuai Polis Pelilih Betong DSP Zamry Alli, bala tuai Opis Polis Pelilih (IPD) bagi Betong enggau ke bukai.-TVS
