SARATOK, 5 Nov: Menijar Waifm Kuching, Monica Midi ngarapka Program Agricorp Waifm Datai Nemuai ke Rumah Suyah Mendas Asal ukai iya kepenudi diatur begulai enggau Opis Betanam Betupi ba rumah panjai enti bisi peminta ari raban ke bekaul.
“Aku ngarap ke ukai semina Rumah Panjai Mendas Asal Saratok endur kami begulai enggau Opis Betanam Betupi tang arapka agi diatur ba endur ke bukai,”ku iya.
Ku terang Monica, sida ba Wai FM Kuching deka seruran bekerejasama enggau pengari rayat ti bisi ngangauka sida ngatur program datai nemuai ke rumah panjai dudi hari.
“Rumah panjai bukai pelaba aku iya ke bisi datai ari rumah panjai bukai malam tu enti bisi deka minta tau ngenatai ke peminta ngagai Yang Berhormat (pengari rayat) kitai.
“Kami endang nyambut program begulai enggau Opis Betanam Betupi baka ke udah diatur kitai ba sitak Krian ditu,” ku iya.
Monica mansutka pekara nya maya bejaku ba Program Wai FM Datai Nemuai ba Rumah Suyah Mendas Asal, kemari.
Ungkup penemu, Program waifm Datai Nemuai begulai enggau Opis Betanam Betupi tu diperambu deka diatur di Katibas, Song, Kapit enggau Sri Aman.
Ba program nya, mensia mayuh bepeluang bekelala enggau bala DJ Radio Iban Wai FM Kuching seraya beperindang enggau sekeda penanyi tebilang Iban.
Program nya bisi empat kali udah diatur di Saratok nyengkaum keterubah ba Pasar Roban maya agi diiring niang Laja Sanggin.-TVS
