PAKAN, 5 Nov: Program Latih ke Menua enggau Bansa (PLKN) 3.0 chukup engkeman nyadi pelasar endur narak displin raban nembiak di menua tu.
Kaban Parlimen Baram, Dato Anyi Ngau madah, kelimpah ari nya penumbuh PLKN tu ila nyema nyadi dipejalaika mega chukup manah ungkup penyerakup mensia mayuh di menua tu.
“Perambu ngidupka baru PLKN nya siti atur ti manah, tambah mega aku mega siku ari komiti pengelikun tu ba Parlimen.
“Nya alai, PLKN tu siti ari chara ulih dikena kita nambah ke agi semangat angkun ke menua lebih agi ba raban nembiak ngambi penyerakup ba menua tu ulih ditanka.
“Aku mega pechaya PLKN tu ila ulih nyadi siti jalai ke ulih alai kitai narak displin ke manah agi ngagai raban nembiak ungkup pemaik ngagai nengeri enggau menua tu,” ku iya.
Iya madah munyi nya lebuh dipinta meri timbal bekaul enggau perambu Perintah Penyerakup ti deka ngidupka baru Program Latih ke Menua enggau Bansa (plkn) 3.0 sepengudah tembu Aum Ngenyit Besai Parti Progresif Demokratik (PDP) Pampang Pakan ba Diwan Mensia Mayuh Pakan, kemari.
Udah nya, lebuh ditanya sekali ke bisi pengelungar diberi ngagai penyereta ke udah bisi ruang bilik dikelaung nyereta PLKN, dia Anyi madah, iya andal ke raban komiti ke bekaul enggau PLKN tentu nemu atur ke patut dikena mutarka pekara nya.
“Asai ba aku pekara nya patut dilempaika ngagai raban ke bekaul lalu aku pechaya sida mega tentu udah bisi ngaga pansik senentang pekara tu ari semua sukut dikena nentu ke atur pemadu manah sereta engkeman nitihka putar pengidup kemaya diatu,” ku terang iya.-TVS
