PAKAN, 4 Nov: Raban Indu Parti Demokratik Progresif (PDP) dilalau terus bekerejasama enggau pangan diri ke pemaik parti sereta pemansang nengeri tu.
Tuai Indu PDP Sarawak, Angnes Jonep madah raban indu PDP lebih agi Pampang Pakan dikearap ulih meri kerejasama ngagai Tuai Indu PDP Pakan ke baru dipilih iya nya Suki Sabot.
“Nyadi aku ngarapka Tuai Indu PDP Pampang tu (Pakan) enggau Sapit iya ulih bejalai ke pengawa enggau manah ngembing semua raban indu di sitak Pakan awak ke kitai ulih chakah agi ngemansang ke sitak tu,” ku iya.
Angnes madah munyi nya sepengudah tembu Pengawa Milih Tuai Indu PDP Pampang Pakan ke baru ba Diwan Mensia Mayuh Pakan pagi tadi.
Lebuh ngelansa pengawa ke diatur Angnes madah Pengawa Milih Tuai Indu PDP Pampang Pakan nya bejalai enggau lanchar ba sepanjai pengawa muai undi.
“Pejalai pengawa milih tuai indu bejalai enggau lanchar enggau nadai penanggul.
“Kitai nitih ke rintai nama ke bisi ba ROS (Gerempung Pengerejister Bansa) lalu ungkup tuai indu iya ke menang serak tu iya nya Suki anak Sabot dipadu nyadi Tuai Indu N. 47 Pakan ke baru lalu dibantu Sapit iya Lisda anak Sigar,” ku iya.
Nya alai, Angnes ngarap tuai indu baru ke udah mujur dipilih ulih bekerejasama enggau semuakaban parti lalu terus bejalaika pengawa enggau manah.
Ungkup penemu, bisi 109 iku Kaban Indu PDP Pakan bisi nurun muai undi milih chalun ba pengawa nya.-TVS
