SARATOK, 3 Nov: Siku Penero Laura Dudum, 40, enda nyangka pemutus nero gambar Pemangku Raja Pahang, Tengku Mahkota Tengku Hassanal Ibrahim Alam Shah Al-Sultan Abdullah Ri’ayatuddin Al-Mustafa Billah Shah deka nyadi kenang pemadu manis dalam pengidup iya.
Ku Laura ke mega siku Orang Nyelai Pendiau (OKU), tuju asal iya nero mua anak raja nya semina deka disimpan nyadika kenang ungkup diri empu ambika kelai udah betimpai mua enggau sida Agong sebilik rambau rambau program Bejalai Ngelala Borneo ke bisi mansa Simpang Saratok, apin lama ke udah.
“Buah runding nero tu datai lebuh ngambat sida iya (Agong sebilik) ba Simpang Saratok maya Program Kembara Ngelala Borneo 12 September tu tadi.
“Maya nya mih aku bisi bejaku enggau sida iya, Agong pan bisi nanya aku nama sakit aku aku madahka aku sakit Cerebral Palsy.
“Nyadi, bekau ari nya aku teulihka runding deka nero mua Tengku…aku endang deka ngiga gambar maya Bejalai Ngelala Borneo sehari nya ambika ditaruh, nyadi pengingat aku empu ngelai sida kala datai ke Saratok,” ku iya.
Laura nusui cherita nya maya dirandau TVS bekaul enggau pengawa iya ke mujur nero gambar Tengku Hassanal ba rumah iya empu ba Taman Miniata Malong Saratok apin lama ke udah.
Udah nya, ku Laura nadai nyangka sekali ulih teulih ke timbal ke positif ari Tengku Hassanal pengudah meda gambar iya disadung ba sebelah media rama.
“Udah siap gaga aku lalu dipost aku ba media rama baka Facebook, Page, IG, TikTok lalu aku pan enda nyangka Tengku bisi ‘React’, ‘Like’, ‘Komen’ enggau repost iya ba Instagram iya empu.
“Chukup gaga ati aku laban aku endang enda nyangka iya (Tengku) meri timbal ngagai dero digaga aku nya enggau positif.
“Utai dipadah iya baka ‘Terima kasih banyak’ ku iya ‘God Bless Dont Give Up’,” ku tusui Laura.
Ungkup penemu, Laura ke mega anak ngagai siku pinchin pengajar ngarapka gambar ke udah tembu didero iya nya ulih disain Tengku Hassanal empu dudi hari.-TVS
