BINTULU, 29 Okt: Chalun ari parti bukai enda ulih kediri enti deka ngalihka sukung ari Gabungan Parti Sarawak (GPS) ba Pengawa Bepilih Mit (PRK) Kunsil Nengeri (DUN) Jepak.
Ku Pengelicha Jabatan Sains Sosial & Pengurusan, Universiti Putra Malaysia Kampus Bintulu (UPMKB) Dr Abdul Hadi Samsi, GPS endang sebuah gempung ke besai ditambah ngembuan rikod ke manah sekumbang megai Perintah Nengeri ngujungka chalun sida lebih tampak dibanding parti bukai.
Lebuh ngelansa senentang pengering parti sepengudah seminggu timpuh bekimpin PRK DUN Jepak, iya madah masuk minggu kedua, bala chalun patut bebendar agi ari sukut strategi kimpin ngambika lebih dikelala bala pengundi ba sitak nya.
“Gaya ke bebida antara GPS enggau parti bukai tu ngujungka sida (chalun) mesti bebendar agi mih baka bejalai dalam siti prinsip ke besai, mesti chakah agi ngelakuka diri, terang ngagai rayat lebih agi ba DUN Jepak tu nama semaya ke ditabur tauka disebut ngagai rayat Jepak ngambika nerima perati sida,” ku iya.
Berebak enggau nya, ngelansa senentang pemar besai ke ditapi ketetiga chalun ke bediri minta pilih ba PRK tu, Dr Abdul Hadi madah nya kebendar baka ni deka matak sukung ari orang biak, lebih agi urung 8,000 pengundi ti keterubah iya ngundi ba endur nya.
Chalun mega patut meri perati ngagai atur deka numbuh enggau ngemanah agi sekeda infrastruktur baruke diguna rayat ba DUN Jepak, kelimpah ari nya patut ngembuan ulah nyerangkung semua ukai semina meri perati ngagai siti endur aja.
Lebuh ngelansa senentang sukung ke diterima ari pengundi naka diatu, Dr Abdul Hadi madah rayat Sarawak naka tu dipeda GPS udah mujur ngamatka peminta rayat, dipandang nengah bemacham pemansang sereta bantu khas ti meri pengelantang ngagai sida.
“Di Sarawak tu pekara ke dipeda kitai dibaruh iring Perintah Nengeri naka diatu ngujungka rayat berasai lantang, rayat gaga enggau rayat ulih meda progres pemansang ke ukai semina danji tang udah dikemujur,” ku iya.
Bisi 22,804 pengundi deka bejalaika tanggungpengawa sida kena 4 Haribulan Sebelas tu enggau PRK DUN Jepak ngemataka tiga chalun deka ngerebut menalan iya nya chalun GPS Iskandar Turkee dilaban chalun ari Parti Bumi Kenyalang (PBK) Stevenson Joseph Sumbang enggau chalun Parti Aspirasi Rakyat (ASPIRASI) Chieng Lea Phing.-TVS
