KUCHING, 29 Okt: Gerempung Anak Seni Iban Malaysia (PASIMA) merambu deka ngatur Pekit Bintang Lagu Klasik Iban (PBLKI) lebih besai agi dudi hari berindik ari sambut ke chukup manah.
Taja pia, ku Presiden PASIMA Isa Lee, semua perambu nya semina ulih dikemujurka enti bisi sukung enggau bantu belanja ari perintah tauka ejensi bekaul.
“Pekit Bintamg Lagu Klasik Iban tu ketiga kali udah diatur nyadi terubah suba dalam taun 2012, kedua ba taun 2016 lalu ditangkan taun tu 2023.10.29
“Iya ti ketiga tu sambut chukup manah taja pan diatur begembar enggau siti agi pekit bekaul enggau lagu Iban besemak ditu.
“Nyadi enti ulih aku deka ke Pekit Bintang Klasik tu diatur ba renggat entarabansa…nya pan enti bisi sukung enggau bantu ari piak bekaul lalu bisi agih belanja dikena,” ku iya maya dirandau pengari TVS pengudah tembu pekit nya ke diatur ba Cristian Ecumonical Worship Centre di Jalai Stampin malam tadi.
Nangkan ke nya, siku penanyi veteran iban ke mega siku ari akim Pekit Bintang Lagu Klasik Iban 2023, Datuk Zamry Amera madahka pekit ke diatur PASIMA nya chukup manah laban ulih dikena ngelala bakat-bakat baru ba bidang pemerindang.
“Baka PASIMA ke udah ngatur program tu enggau chukup manah peda aku.
“Tu kedua kali aku udah dikangau nyadi akim nyadi berasai temegah ati laban enti dibanding enggau kami kelia jeman 70an kami belagu ari nadai nemu utai baka tu, semina bepekit ba sekula tauka ari pelilih-pelilih baka nya aja.
“Kami nadai orang ngajar nadai apa semua tang diatu peda aku penanyi baru diatu sigi amat landik.
“Chukup manah iya ke diatu laban utai dikena nya amat manah enda baka kami ke lama suba,” ku iya .
Ba Pekit Bintang Klasik Lagu Iban 2023 nya, ngemataka gelar champion diempu Gilbert Annie ti nyadaka lagu Udah Laun Tua Betemu (penanyi asal Andrewson Ngalai) enggau Enti Pengerindu Udah Beserangan (Jeffry Molly), lumur dua Ethan Hunt nyadaka lagu Pulai Mih Sulu (Ellison Ludan) enggau Penyayau Enda Luya (Ellison Ludan) ditangkan lumur tiga Nicholas Layang nyadaka lagu Lyana (Andrewson Ngalai) enggau Tusah Ati Tinggal Bini (Edward Kuju).
Ketetiga pemenang nya bela nerima perais mata duit, trofi enggau setipikit.-TVS
