KUCHING, 29 Okt: Siku pengereja pengawa perintah iya nya Gilbert Annie enda nyangka diri ulih ngempu gelar champion Pekit Bintang Lagu Klasik Iban 2023.
Ku iya, kebendar niat lebuh maya bepekit iya nya semina rindu merindang lalu ngarapka mensia mayuh ke bisi datai ulih teperindang meda iya belagu.
Nya alai, lebuh dirandau TVS, Gilbert ngarapka nengah pemujur ke dijapai nya iya deka terus mekuhka pengawa merindang awakka ulih nyadi penatai pemisi tambah ngagai iya dudi hari.
“Aku masuk Pekit Bintang Klasik Lagu Iban tu kebendar semina belagu rindu ati aja.
“Nya alai, aku meri terima kasih ngagai Pasima enggau ‘Chief’ aku Albert ke udah nulung aku ngerejista (masuk pekit).
“Enti nitih aku enggai enggau bepekit laban ngasai diri udah lelak gawa, nyadi aku pengawa tu dianggap aku ulih nyadi ‘side income’ jemah.
“Nyadi arapka utai (pekit) tu diteruska laban bisi agi bakat baru ba luar din lebih manah,” ku seraya madah diri enda nyangka ulih menang pekit.
Nangkan ke nya, siku agi pemekit ke bulih penuduk lumur dua asal ari Utah, Amerika Syarikat iya nya Ethan Hunt mega madah nadai nyangka teulih lumur laban tu baru kedua kali iya udah nyereta pekit belagu.
“Utai tu utai ke enda disadang aku laban tu baru kedua kali aku enggau orang bepekit ke baka.
“Nya alai, aku berasai tekenyit mimit tang tepantup ati enggau pemutus tu laban udah bulih penuduk lumur dua Pekit Bintang Klasik Lagu Iban 2023.
“Meri tabi pengaga ati nuju pemekit bukai laban aku meda semua bela udah mandangka bakat ti pemadu manah,” ku iya.
Udah nya, pemenang lumur tiga pekit Nicholas Layang madah diri chukup tepantup ati enggau pemutus nya.
“Terima kasih ngagai Petara laban udah meri peluang meri runding enggau ulih bepekit enggau manah.
“Aku ngaga ‘spontan’ aja lalu pemutus bulih lumur tiga pan udah chukup ba aku asil belatih lama dalam tiga bulan baka nya ungkup pekit tu,” ku iya.
Pekit Bintang Lagu Klasik Iban 2023 diatur Gerempung Anak Seni Iban Malaysia (PASIMA) ba Diwan Christian Ecumenical Worship Centre Stampin, malam tadi.
Ba pekit nya ngemataka champion mai pulai perais mata duit sepenyampau RM2,500, lumur dua RM1,500 enggau lumur tiga RM700 sereta bela disempulang trofi enggau setipikit.
Udah nya, pemenang perais pengaga ati nerima perais sepenyampau RM300 disempulang trofi enggau setipikit.-TVS
