SARATOK, 27 Okt: Chairman Kaunsil Pemansang Ikan Malaysia (LKIM) Muhammad Faiz Fadzil ngelalau raban orang berikan lebih agi Kabong anang semina ngandalka pengawa berikan aja nyadika penatai pemisi sida.
Ku iya, tu betuju ngambika penatai pemisi sida semampai enda putus lebuh maya datai musin landas.
“Kitai (orang berikan) enda ulih semina ngandalka pengawa berikan aja laban kekadang ikan nadai nitihka musim tauka ketegal maya landas (monsun) enggau ke bukai ke lalu ngujungka kitai enda ulih nurun berikan,” ku iya.
Muhhamad Faiz mansutka pekara nya maya bejadika Program Rahmah Mesra Madani Chairman LKIM begulai enggau Gerempung Orang Berikan Sitak (PNK) Kabong diatur ba Mini Komplek LKIM Kabong, kemari.
Kenu ku Muhammad Faiz, kaban PNK Kabong anang enda nguji nguji mekuhka industri akuakultur tauka pengawa nupi ikan sungai tauka undang sungai.
“Nyadi Gerempung Orang Berikan ukai semina ba Kabong aja tang selampur menua tu diperansang ngaul diri dalam industri akuakultur.
“Reti nya tadi baka nupi ikan sungai tauka undang sungai ke ulih meri penatai pemisi ke lebih ari pengawa berikan (di tasik),” ku tandu iya.
Bepelasarka rikod, bisi 91 buah pampang PNK ke bisi ba selampur menua bela diperansang mekuh bemacham aktiviti ekonomi kelimpah ari pengawa berikan ngambika penatai pemisi sida seruran tegap.-TVS
