SARATOK, 27 Okt: Inisiatif Sekula Primari (SK) Sungai Klampai ngatur Program One Beyond ba sekula nya nerima puji.
Kaban Kaunsil Nengeri (ADUN) Krian Friday Belik madah, pemujur program nya mandangka kerejasama tegut entara raban pengajar enggau bala apai indai nembiak ba sekula nya dalam ngemansangka pekara pelajar.
“Tabi puji ngagai pengawa nengah iring Kepala Pengajar enggau raban staf sekula di SK Sungai Klampai ditu.
“Tu mih pengawa ke manah laban udah mai bala nembiak enggau bala pengajar sereta disukung bala apai indai nembiak.
“Nyadi tu mih pengawa ke badas iya nya besaup ngemansangka sekula sesingkang ke mua,” ku iya.
Iya madah munyi nya lebuh bejadika Program One Step Beyond ba SK Sungai Klampai Saratok, kemari.
Ku tandu Friday, pemujur program nya mega nyadi bukti nembiak ba sekula nya ulih nyingkang jauh ba pengawa sekula.
“Program One Step Beyond tu siti ari program ke tau dikumbai kitai chara dikena kitai nyingkang ke maju ke mua.
“Tu sempama baka kitai ke niki tangga, nyadi diatu kitai dipeda udah niki setangkal tauka dua tangkal ari kitai ke diatu.
“Reti nya tadi kitai terus maju ke mua, kitai surut tang terus mansang ke mua taja pan kitai dipeda agi mengkang dia,” ku terang iya.
Ungkup penemu, Program One Step Beyond ba SK Sungai Klampai ditumbuhka ba taun 2022 lalu naka tu udah mujur bulih Gelar Midul Pirak ba Pekit Renggat Nasional enggau Sarawak.-TVS
