SARIBAS, 26 Okt: Perintah besai nengah Opis Pelajar Malaysia (KPM) patut bechuan ke projek ke udah kala dipejalaika Perintah Sarawak sereta ngundan pakej perengkaguna ti disikap penuh.
Sapit Menteri Pemansang Orang Indu, Anak Mit enggau Komuniti (KPWKK) Sarawak, Datuk Mohd Razi Sitam madah, Sekula Primari (SK) Maludam siti ari chunto projek sekula ke ulih ditunda dikena ngemansangka sekula bukai di nengeri tu nyengkaum ungkup SK Sebemban.
“Aku ngarapka raban Opis Menteri Pelajar ulih nyendiaka perengkaguna ke disikap penuh laban nya endang udah nyadi tanggungpengawa perintah.
“Ambika chunto, ba SK Maludam siti ari chunto projek ke dipelanja penuh Perintah Sarawak disikap enggau perengkaguna ke penuh.
“Nya alai, aku ngarapka KPM ulih bejalaika atur ke sama ungkup SK Sebemban tu,” ku iya.
Razi ke mega Kaban Kunsil Nengeri (ADUN) Saribas madah munyi nya lebuh meri timbal pasal Projek Ngaga Baru Begunan Sk Sebemban ke dipeda agi puang pengudah bejadika Hari Lumba Menua Renggat Sekula ke diatur begulai enggau Librari Tumpuk Pendiau (RGC) Layar ba Padang Futsal SK Sebemban, kemari.
Nangkan ke nya, ku Razi iya tetap beterima kasih ngagai Perintah Besai laban mujur bejalaika projek ngaga baru begunan kelas SK Sebemban ke udah manggai lebih 90 peratus tembu lalu ngarapka penanggul perengkaguna ke empai chukup ba sekula nya ulih teputar enggau lengkas.
“Terima kasih laban ‘Projek Gantian Penuh’ SK Sebemban diatu udah tembu lebih 90 peratus.
“Kitai ngarapka (begunan baru) nya ulih dikena enda lama agi lalu ngarapka KPM nyendiaka perengkaguna ke pemadu baru baka bangku enggau mija ti ukai agi digaga ari kayu,” ku iya.
Ungkup penerang, projek ngaga begunan baru ngaul enam buah kelas ba SK Sebemban berengkah ba taun 2019 nguna agih belanja manggai urung RM9 juta.-TVS
