KUALA LUMPUR, 22 Oktober: Anak Sarawak mih nyadi penampung dalam nentuka Gabungan Parti Sarawak (GPS) terus bisi daya megai perintah Sarawak nyentuk jemah ila.
Premier Sarawak, Datuk Patinggi Tan Sri Abang Johari Tun Openg madah, pekara nya bepanggai ba sukung, pengeransing, pengeran enggau pengepuh anak Sarawak besaup ngetanka hak nengeri tu ba renggat perintah besai.
Iya madahka dikena nentuka pekara nya mujur, semua anak sarawak mesti begempung, beserakup dalam semangat Malaysia.
“Kitai ba dalam menua Malaysia. Kitai dalam perintah besai enggau bisi pengelebih diri empu.
“Kitai bisi hak ba dalam konstitusyen perintah besai. Nya alai aku enggau kaban kabinet nengeri ke bukai ngaga pemutus pasal GPS mih platform ke nemban dalam ngetanka hak Sarawak,” ku iya.
Iya mansutka jaku nya rambau Randau Mensia Mayuh Sarawak Agenda beserimbai enggau Program Lan Berambeh Anak Sarawak (LBAS) 2023 di Kuala Lumpur lebuh Hari Enam.
Abang Johari mega madahka, bala tuai ke megai perintah jam ke diatu deka diganti rebak baru ti nampung agenda ngemansangka sarawak ngambika terus nyingkang ke mua.
“Nyadi aku ngarapka pengidup dudi hari kita majak manah lebih agi anak-anak Sarawak ke ulih ngetanka sistem politik ti dipejalaika di Sarawak,” tandu iya.
Pia mega, iya madahka perintah GPS ba penuduk ke tegap dalam perintah besai nyengkaum Datuk Seri Fadillah Yusof nyadi Sapit Menteri Besai, sereta lima iku Kaban Parlimen GPS nyadi menteri penuh ba renggat Perintah Besai. – TVS
