SARATOK, 20 Okt: Program Waifm Datai Nemuai ke Saratok ba Rumah Suyah Japang Mendas Asal ditu deka diatur begembar enggau program AGRICorp.
Kaban Kunsil Nengeri (ADUN) Krian Friday Belik madah, pekara nya udah disetuju Direktor Opis Betanam Betupi Sarawak ba randau ke diatur begulai enggau raban komiti bekaul sebedau tu.
“Program WaiFM Datai Nemuai serak tu deka digembar enggau Program AGRICorp iya nya program begulai enggau rayat ke diaduka Opis Betanam Betupi menua Sarawak.
“Nya alai aku meri terima kasih ngagai Direktor Opis Betanam Betupi Sarawak laban udah setuju deka ngatur Program AGRICorp tu ngembar Program WaiFM Datai Nemuai baka sekali tu.
“Nyadi tu dikumbai kitai program dua dalam satu,” ku iya.
Iya madah munyi nya pengudah tembu aum raban Komiti Program Waifm Datai Nemuai ke Saratok ba Bilik Aum Opis Pelilih Saratok, ensana.
Bemacham aktiviti deka diatur maya tu ila baka Demontrasyen Nagang Penusah Angus, Licha Pengelikun ba Jalai Besai Pan Borneo, Beperesa Pengerai, Licha Ari MPOB sereta Kaunsil Lada Malaysia enggau ke bukai.
Ungkup penemu, sebedau tu Program Waifm Datai Nemuai ke Saratok ditaga diatur kena 20 ngagai 22 Oktober tu tang dilanjar ngagai 3 nyentuk 5 November ketegal penanggul ke enda ulih diseliahka.-TVS
