BETONG, 15 Okt: Opis Pelilih Bagi Menua Betong diperansang bekerejasama enggau Opis Kampung Sarawak (JHS) ngemujurka inisiatif nanam kayu ba kandang endur tauka pasar ke dijaga sida.
Residen Bagi Betong, Richard Michael Abunawas madah, inisiatif tu beguna bendar dikena nentu ke perampa menua meruan gadung sereta manah.
“Kaunsil Pelilih endang ngembuan tanggungpengawa pemadu besai dalam nentuka perampa menua ba kandang endur ke dipegai sida dijaga.
“Nyadi kitai chukup meransang Opis Kaunsil Pelilih lebih agi di Betong patut ngatur kerejasama bejalaika program nanam kayu ba mengeri lebih agi ba pasar ngambi lebih manah agi dipeda ari sukut landskap,” ku iya.
Iya madah munyi nya lebuh ngarika Sapit Menteri Nembiak, Lumba enggau Main sereta Pedagang Sarawak Dato Gerald Rentap Jabu bejadika Program Le Tour De Restoration 2.0 (LTDR 2.0) ditu, empa lama.
Udah nya, ku iya mensia mayuh patut nemu tanggungpengawa diri dalam nyaga pemanah rampa menua ungkup rebak dudi.
“Nya alai, aku meransang semua raban sama meri perati lalu sama-sama nyaga rampa menua kelimpah ari kitai ngatur projek pemansang bejalai lanchar tang pemanah rampa menua mega patut dikemeratka.
”Ekosistem kampung jerung kitai iya nya siti reta pemadu beguna lalu patut ditanka ngambika meri pemaik ngagai rebak dudi,” ku terang iya.
Ungkup penemu, program ke sama mega udah kala diatur ba Sarikei, Bintulu, Miri, Lawas, Kapit, Sibu, Betong, Kuching enggau kepenudi di Lundu.
Sama bisi datai, Sapit Direktor Opis Kampung (JHS) Sarawak, Semilan anak Ripot enggau ke bukai.-TVS
