Perintah deka beratika baru tagit asal pemansang Pemansut Kasar Asil Dalam Menua (KDNK) entara 6.0 peratus nyentuk 7.5 peratus bagi semua taun berindik ari fasa keterubah atur nagang pemindah.
Menteri Pekara Wang, Tengku Datuk Seri Zafrul Tengku Abdul Aziz, madahka iya endang ngaku sentang pemansang ekonomi napi empas ari industri mayuh ditutup berindik ari atur nagang pemindah dikena nagang pengelekai igi penyakit COVID-19 di menua tu.
Iya madahka, pengawa ngatur baru kadar KDNK nya deka meri empas ngagai takat defisit menua, tang dipeda baru ke semua KDNK maya 2021 deka ba wilayah positif dibanding taun ti udah.
Nambahka nya, anggar pengerugi ekonomi maya diatu dipelabaka RM1 billion sehari lalu perintah ke bendar enda ulih nampung pengerugi ketegal atur nagang pemindah ti kelalu lama.
Berebak enggau nya, iya madahka, fasa kedua enggau ketiga dipelaba ulih mantu ngurangka pengerugi tu enti mayuh agi sektor dagang dikemendarka beroperasyen.
Ba fasa ketiga, ku iya, deka digaga pengudah ulih nyapai betuchuk vaksin 40 peratus sereta ngena ICU ba tahap ke likun sereta kes sehari ba baruh 2,000.
