PUSA, 10 Okt: Sekeda orang ke dirandau pemberita TVS beserimbai enggau pengawa mantaika Bajet 2024 chukup ngandalka Perintah Penyerakup uloh meri perati ngagai kos pengidup ke majak niki.
Ku penemu siku penanyi Iban, Daneil James pekara ke dikearapka iya ba bajet serak tu iya nya deka perintah terus nyaga rega barang ngambika enda kelalu nating pengidup rayat.
“Ungkup Bajet 2024 aku ngarap ke iya manah agi ari ke udah, enti ulih minta perintah neruska atur meri subsidi ngagai barang ke diguna ninting hari baka berau, minyak makai, tepung enggau ke bukai,” ku iya.
Nangkan ke nya, ba penemu pengajar Mohd Sharkawi Meni, iya ngarapka Bajet 2024 ulih ngangkatka agi pemansang infrastruktur pemun baka jalai alun, bekal ai beresi enggau ke bukai.
“Arapka ba bajet tu (2024) ulih nyaran ngagai perengkaguna rayat di menua pesisir tauka ulu sungai sereta nambahka agih dikena ngemujurka pemansang infrastruktur pemun baka jalai alun enggau bekal ai beresi,” ku iya.
Udah nya, siku pinchin soldadu Hussain Mili, ngarapka nengeri Sarawak ulih meri agih belanja ke lebih besai ari ke udah.
“Laban ke nyadi siku ari anak Sarawak aku endang ngandalka Bajet 2024 tu ila lebih mayuh agi ari ke udah dikena ngemanahka agi perengkaguna tauka pemansang ke agi kurang di Sarawak,” ku iya.
Ungkup penerang, Bajet 2024 dipelaba deka dibantaika Menteri Besai Datuk Seri Anwar Ibrahim di parlimen kena Hari Lima tu ila.-TVS
