PUSA, 8 Okt: Agih belanja sepenyampau RM400, 000 udah disuaka ngagai 12 buah Gerempung Apai Indai Nembiak Enggau Pengajar Sekula (PIBG) ba sitak Kunsil Nengeri (DUN) Saribas kena Hari Lima tu tadi.
Kaban Parlimen Betong, Dr Richard Rapu madah, semua agih belanja nya dikemendarka nengah ‘Projek Mesra Rayat’ (PMR) dibaruh Perintah Besai.
“Penemuai kami duai YB Mohd Razi serak tu laban deka nyuaka sekeda chek agih belanja dibaruh ‘Projek Mesra Rayat (PMR) ari Opis Menteri Besai ti udah dikemendar.
“Ungkup Parlimen Betong taun tu DUN Saribas…bisi 12 penerima enggau bemacham projek enggau penyampau dipegulai sekali mangai RM400, 000 ungkup semua sekula ditu lalu tu mega dikearap bisi dikena sida PIBG ngemujurka aktiviti bekaul,” ku iya.
Dr Richard madah munyi nya pengudah tembu nyua cek ngagai 12 buah PIBG sekula ba DUN Saribas diatur ba Palan Belelak Perintah kena Hari Lima.
Nya alai, iya ngarap nengah agih belanja nya ulih dikena ngemansang agi pekara pelajar nembiak ba sekula lebih agi di DUN Saribas.
“Aku ngarapka nengah pemisi agih belanja enggau bantu tu ulih mutar ke semua isu sereta penanggul ba sekula diri empu.
“Pia mega nengah agih belanja tu arapka nya ulih dikena ngemanah agi perengkaguna ungkup bala pengajar enggau nembiak bejalai ke aktiviti belajar sida,” ku terang iya.-TVS
