BETONG, 7 Okt: Klinik Nanga Mujau ditu chukup betuah laban udah nyadi klinik di menua pesisir keterubah di Sarawak nerima bantu kereban perubat enggau ukai perubat nengah Program Tanggungpengawa Rama Korporat (CSR) Petronas.
Nya alai Pegawai Opis Pengerai Bagi Menua Betong, Dr Mohamad Norhaizan Ahmad ngarapka Petronas ulih mantu peranak menua pesisir ti begunaka sekeda kereban ukai perubat ke bekaul pengerai mulut.
“Kitai ba Klinik Nanga Mujau berasai betuah laban dipilih nyadi siti klinik terubah di Sarawak nerima pemeri kereban perubat enggau ukai perubat ari Petronas.
“Pengawa tu asil ari inisiatif SABATI ke udah mungkal program ngiga bagi klinik ba menua pesisir ke patut diberi bantu ari Petronas,” ku iya.
Dr Mohamad ke baru pindah ke Betong nganti penuduk Dr Johnny Pangkas sebedau tu madah munyi nya pengudah tembu Pengawa Nyua Bantu Kereban Perubat Pemun Ari Petronas ke diatur ba Rumah Panjai Isop, Nanga Mujau ditu kemari.
Nangkan ke nya, Dr Mohamad mega ngarap peminta ngagai petronas mantu perayat di menua pesisir ngaga ngeli pelesu ulih dikemujur enggau lengkas.
“Lebuh beratika sukut pengerai mulut tauka pengerai ngeli ba menua pesisir.
“Nyadi kitai deka bekerejasama dalam nyendiaka ngeli pelesu ngagai rayat mayuh ti beguna enggau pekara tu deka dikerandauka enggau nyentuk agi begulai enggau raban SABATI, sereta mega Petronas.
“Nya alai, arap ke pekara nya ulih sereta mujur dipejalaika enggau lengkas,” ku terang iya.
Ngelansa pasal program CSR nya kebendar dikemujur nengah kerejasama antara Petronas, Gerempung Bala Bini Menteri enggau Bini Sapit Menteri Sarawak (SABATI) sereta Opis Pengerai.
Bisi 22 bansa kereban perubat enggau ukai perubat beungkur RM50,000 disuaka maya nya.
Klinik Nanga Mujau iya nya siti ari 26 klinik di nengeri tu dipilih ungkup program ke udah disediaka enggau agih belanja sepenyampau RM1.3 juta.
Sama bisi datai ngulu program tu Sapit Premier Sarawak, Datuk Amar Douglas Uggah Embas, Kaban Kunsil Nengeri (ADUN) Layar Dato Gerald Rentap Jabu, Kaban Parlimen Betong Dr Richard Rapu, Direktor Pengatur Petronas LNG Laga Jenggi, Residen Betong Richard M Abunawas enggau pengari SABATI Datin Rosemarie Wong.-TVS
