BETONG, 7 Okt: Raban serikat besai tauka korporat diperansang terus bekerejasama enggau ejensi perintah dalam ngangkatka agi pengidup rayat ke diau di menua pesisir.
Sapit Premier Sarawak, Datuk Amar Douglas Uggah Embas madah, kerejasama ejensi perintah enggau serikat besai baka Petronas chukup beguna ungkup pemaik rayat mayuh.
“Ukai keterubah enggau iya ke kepenudi tang patut mayuh agi program patut digaga nengah kerejasama perintah enggau raban peribit.
“Kerejasama antara sektor peribit enggau perintah baka tu chukup beguna dalam ngangkatka pengidup rayat ba kandang menua pesisir,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya lebuh bejadi ke Pengawa Nyerah Ke Kereban Perubat Pemun Ngagai Klinik Nanga Mujau ba Rumah Isop anak Iba di Layar ditu, kemari.
Nangkan ke nya, ku Uggah ngambika raban Petronas nemu kebendar sitak Layar tu chukup betuah laban karan semua udah bisi, jalai raya pan udah bisi magang semina ai (beresi) aja bedau disambung ngagai Nanga Mujau.
Ngelansa pekara bukai, Uggah ngelalau mensia mayuh anang enda nyaga pengerai diri empu.
“Pia mega ngenang pasal pengerai, anang takut bechek laban enti penyakit nya ditemu tumu kitai deka jampat agi berubat sereta jampat agi kitai gerai.
“Udah nya kitai ngadu ke anak kitai besekula kelimpah ngatur awak nitihka singkang rayat ke diau di mengeri nuju juluk nyadi nengeri maju manggai taun 2030,” ku iya.
Sama bisi datai Sapit Menteri Nembiak, Lumba enggau Main sereta Pedagang Sarawak, Dato Gerald Rentap Jabu, Kaban Parlimen Betong, Dr Richard Rapu enggau ke bukai.-TVS
