Kuching, 20 Jun – Empat kluster baru ditukuka Opis Pengerai Nengeri Sarawak (JKNS) iya nya Kluster Jalai Usaha Jaya, Kluster Kampung Taba Sait enggau Kluster Jalai Tabuan Tranquility di pelilih Kuching sereta Kluster Lorong Perlis Empat di Miri.
Ku Komiti Mutarka Penusah Ngenyit Nengeri (JPBN) Sarawak madah, Kluster Jalai Usaha Jaya siti kluster endur gawa ti disidi ngaul buding pekereja sebuah kilang elektronik di Jalai Usaha Jaya, Kuching ti ngaul kes berampit COVID-19 entara pekereja kilang nya nengah pemindah sosial enggau kontak semak.
Bisi 170 iku udah diperesa ke alai 13 kes udah ditetapka positif COVID-19 ti nyengkaum kes indeks, 121 kes ditetapka negatif, lalu 36 kes agi nganti pemutus makmal.
“Semua kes positif COVID-19 tu udah dipasuk ke Sepital Besai Sarawak enggau PKRC di pelilih Kuching ngambika diengkah kediri sereta diperubat.” ku JPBNS madah.
Kluster Kampung Taba Sait siti kluster komuniti ti disidi ngaul peranak di Kampung Taba Sait, Skim Palan Pengentap Pendiau Baru Bengoh, Kuching ti ngaul kes berampit COVID-19 entara peranak di genturung pendiau nya nengah pemindah sosial enggau kontak semak.
Bisi 31 iku udah diperesa ke alai 10 kes udah disidi positif COVID-19 ti nyengkaum kes indeks, 11 kes ditetapka negatif enggau 10 kes agi nganti pemutus makmal.
“Semua kes positif COVID-19 tu udah dipasuk ke Sepital Besai Sarawak enggau PKRC di pelilih Kuching ngambika diengkah kediri sereta diperubat.” ku iya madah.
Entudi ke nya, Kluster Jalai Tabuan Tranquility iya nya siti kluster ba endur gawa ke disidi ngaul pekereja sebuah restoran pemakai di Jalai Tabuan Tranquility, Kuching ti ngaul kes berampit COVID-19 entara pekereja premis pemakai nya nengah pemindah sosial enggau kontak semak.
Bisi 42 iku udah diperesa ke alai 13 kes udah ditetapka positif COVID-19 ti nyengkaum kes indeks enggau 29 kes ditetapka negatif.
“Semua kes positif COVID-19 tu udah dipasuk ke Sepital Besai ini Sarawak enggau PKRC di pelilih Kuching ngambika diengkah kediri sereta diperubat.
JPBNS mega madahka, Kluster Lorong Perlis Empat, Miri iya nya siti kluster komuniti ke disidi ngaul kuarters pekereja sebuah serikat ke udah ba baruh Atur Nagang Pemindah Diteritka (PKPD) di Lorong Perlis Empat, Kuala Baram, Miri maya hari minggu.
Bisi 769 iku udah diperesa ke alai 33 kes ke ditetapka positif COVID-19 ti nyengkaum kes indeks, 323 kes ditetapka negatif enggau 413 kes agi nganti pemutus makmal.
“Semua kes positif COVID-19 tu udah dipasuk ke Sepital Miri enggau PKRC di pelilih Miri ngambika diengkah kediri enggau diperubat.” ku JPBNS madah agi.
Nangkan ke nya, JKNS ngenukuka empat kluster udah punas sepengudah nadai ngerikodka kes baru dalam timpuh 28 hari ti ngaul Kluster Jalai Stadium Negeri, Kuching, Kluster Taman Sourabaya Indah, Kuching, Kluster Jalai Jambatan Gantung, Kuching sereta Kluster Sungai Majau, Kanowit.
Penyampau kluster ke agi aktif iya nya 95 kluster, 14 kluster aktif ke udah ngerikodka 158 penambah kes baharu, seraya 81 kluster nadai ngerikodka penambah kes naka hari minggu.
