Kuching, 20 Jun – Opis Bomba Enggau Penyelamat Malaysia (JPBM) Sarawak enda lantang ati senentang ulah kasar sekeda mensia mayuh ngagai siku raban bomba lebuh madamka penusah angus ti nyadi ba sebuah rumah di kampung belipat, Lawas maya hari enam.
Ku Direktor Opis Bomba Enggau Penyelamat Malaysia (JPBM) Sarawak, KHirudin Drahman pekara nya keterubah nyadi ti ngaul raban bomba di nengeri Sarawak.
Khirudin Drahman madahka, pekara nya nyadi lebuh siku raban bomba benung madamka api ba rumah nya urung pukul 3.18 lemai, lalu diserang sekeda mensia mayuh ke bisi ba endur nya.
Ku iya madah, penusah nya nyadi bepun ari orang ke ngempu rumah nya ngeransi ketegal rumah pesaka lama sida angus.
Tajapan pia, pegawai bomba nya nguna chara profesional lebuh bejalaika pengawa sereta udah ngaga ripot polis senentang pekara tu urung pukul 9.14 malam tadi.
“Nitihka insiden nya, tu siti penyalah ba baruh seksyen 51 Akta Perkhidmatan Bomba 1988 iya nya nagang sereta kasar enggau raban bomba. Pekara tu udah dirikodka pihak bomba sereta tasat benung dipejalaika dikena nentuka perkara tu enda nyadi agi. Nitihka ripot ti keterubah, opis bomba sereta pegawai bomba nya empu bela udah ngaga ripot. Taja pia, indai saspek nya udah minta ampun ngagai pegawai nya lalu pegawai nya udah narit ripot iya. Tang opis bomba tetap bejalaika tasat bekaul enggau pekara nya.” ku Khirudin Drahman lebuh dirandau pengarang berita TVS maya hari minggu.
Nangkanka nya, Khiruddin ngelalau mensia mayuh ngambika terus beserakup sereta nyukung pengawa raban bomba kelebih agi ba program nyeliahka penusah angus.
Orang ke salah nya deka tetap ditinggang ukum ba baruh Seksyen 15 , Akta Perkhidmatan Bomba 1988.
Ku iya nambah, saspek ke nyerang pegawai bomba nya udah direman empat hari berengkah sehari tu.
