SARATOK, 30 Sept: Perambu deka ngelempaika kuasa ngagai Tuai Raban Bansa (KMKK) mutar ke isu beduan seksual enggau ulah kasar dalam ruang bilik endang perambu ke engkeman, ku Mohd Razi Sitam.
Sapit Menteri Pengelantang Indu, Anak Mit enggau Pengelantang Komuniti (KPWKK) Sarawak nya madah, pekara endang udah dikereja sida nyema bisi nyadi kes ke ngaul nembiak ba baruh jaga sida ngelama tu.
“Aku endang sigi nyukung perambu tu lalu pengawa tu udah dipejalaika kitai ba genturung pendiau tauka rumah panjai ngelama tu.
“Sida tuai raba bansa mega nyadi orang keterubah dipinta kitai ngatur semua pekara bekaul enggau kes beduan enggau keruga ruang bilik baka ngaul adat tikah.
“Nyadi perambu deka meri kuasa ngagai KMKK mutar ke isu bekaul enggau ruang bilik tu endang sigi patut,” ku iya.
Razi madah munyi nya lebuh dipinta meri timbal bekaul enggau perambu dibantaika Menteri Pemansang Indu, Ruang Bilik enggau Komuniti Dato Sri Nancy Shukri sebedau tu sepengudah bejadika Program Ngintu Hari Malaysia Renggat Pelilih Saratok 2023 diatur Gerempung Veteran Raban Soldadu Malaysia (PVATM) begulai enggau Palan Servis DUN Kalaka enggau Opis Pelilih Saratok ba Panggau Besai Sri Kalaka ditu, pagi tadi.
Taja pia ku Razi, skop bungkur pengawa tu mesti diserenih enggau silik laban penyadi nya ila ngaul mayuh agensi ke bekaul baka polis, opis pengarap, Kaunsil Tusun Adat enggau ke bukai
“Pekara tu tau diperundingka enggau manah agi laban pejalai atur iya ila ngaul bemacham agensi baka Opis Pengarap, Kaunsil Tusun Adat enggau Opis Pelilih.
“Pia mega pekara ke pemadu berat iya nya pekara bekaul enggau ejensi penerit adat baka sida polis enggau ke bukai.
“Nya alai enti kitai dekaka sida KMKK bejalai ke atur tu pekara tu mesti dipeda ari bemacham sukut tauka aspek sereta mesti diserenih dulu,” ku terang iya.-TVS
