ROBAN, 29 Sept: Kerejasama rat entara Opis Bomba enggau Penyah Penusah Malaysia (JBPM) Sarawak enggau komuniti terus beguna dikena napi pangka Monsun Timur Laut (Musin Landas).
Direktor JBPM Sarawak Datu Khirudin Drahman madah pekara nya kala dibantaika Chairman Komiti Pengatur Tasah Nengeri (SDMC) Datuk Amar Douglas Uggah Embas ti minta sida bejalaika pengawa begempung dalam siti tim.
“Penyikap kitai lebih agi ari sukut keresa enggau sukung ari komuniti bepelasarka peneleba kitai taun 2018, 2019, 2020, 2021, 2022 dalam ngatur enggau ngurangka pengirau ati mensia mayuh.
“Enti dibanding ba endur bukai penyikap lebih agi ari SDMC, DDMC enggau raban bekaul Bomba, Penyaga Mensia Mayuh, raban Polis enggau mega Opis Pelilih, Opis Residen udah nyadi siti gempung ke chukup manah.
“Pekara tu kala dibantaika Chairman SDMC ke mega Sapit Premier Datuk Amar Douglas ti minta gempung tim enggau kitai enda ulih gawa ngati kediri,” ku iya.
Khirudin mansutka penerang nya maya ngulu Program Jangkauan Luar MLNG Bestari ba SMK Kalaka ditu empai lama.
Nya alai ku iya, JBPM deka terus bejalai ke latih ba sekeda endur lebih agi ngaul Palan Ngenduh Sementara (PPS) enggau ari sukut gempung tauka kerejasama tim.
“Lebuh nyebut pasal Monsun Timur Laut tu iya nya penyadi ke suah nyadi ninting taun.
“Udah tentu bisi gerah ari indu opis baka opis menteri. Sida madah ngagai raban SDMC, perintah nengeri Sarawak udah ngatur sekeda aum, nyadi udah tu kitai deka ngatur siri latih lebih agi ba PPS dikena negapka penyikar tim,” ku terang iya.-TVS
