BETONG, 26 Sept: Sapit Menteri Pengelantang Indu, Nembiak Mit enggau Pengelantang Komuniti (KPWKK) Sarawak Mohd Razi Sitam ngelalau Opis Pelilih lebih profesional lebuh ngaga sebarang pemutus bekaul enggau sebana tauka kompelin ke bisi dikenataika mensia mayuh.
Ku iya, sida enda ulih semina mendingka penemu ari siti piak aja tang patut lebih tebuka dalam berati enggau nisih sesebengkah ripot.
“Aku minta Opis Pelilih ke nyadi opis adminstrasyen ti ngatur pekara tu ulih mansik lalu minta ripot ari KMKK ke diripotka nya.
“Kebuah pia, laban kitai enda ulih mending ari siti piak aja tang mesti mendingka (sebana) ari kededua piak senentang pekara tu nyengkaum aku empu.
“Kitai mesti profesional lebuh ngaga pemutus, mutarka sebana dibantai mensia mayuh. Pekara nya mesti ditisih enggauchara tebuka sebedau ngaga sebarang pemutus,” ku iya.
Razi ke mega Kaban Kunsil Nengeri (ADUN) Saribas madah munyi nya pengudah ngulu Aum Komiti Panel milih Tuai Raban Bansa (KMKK) ba Bilik Aum Kenyalang, Opis Residen ditu, kemari.
Nangkan ke nya, Razi ngarapka genap Tuai Raban Bansa (KMKK) ke udah dichiri nyadi ketuai dikearap ulih gawa enggau manah.
“Aku chukup ngarapka genap KMKK ke udah dichiri mangku pengawa ari Opis Pelilih ulih bejalai ke tanggungpengawa diri enggau manah lebih agi senentang pekara bekaul enggau isu rayat tauka mensia mayuh ba kandang endur ke dipegai,” ku iuaa
Sama bisi datai Kaban Parlimen Betong Dr Richard Rapu, Kaban Parlimen Batang Lupar Mohd Shafizan Kepli, Kaban Parlimen Lubok Antu Roy Gingkoi, Kaban Kunsil Nengeri (ADUN) Lingga Dayang Noorazah, ADUN Krian, Friday Belik enggau ke bukai.-TVS
